Нямцоў жорстка раскрытыкаваў палітыку Лукашэнкі :: Хартыя'97 :: Навiны

Адзін зь лідэраў "Союза правых сил", лідэр думскай фракцыі СПС Барыс Нямцоў выступіў з рэзкай крытыкай Аляксандра Лукашэнкі за “падвойную гульню” ў працэсе стварэньня “саюзнай дзяржавы Расеі й Беларусі. "Перакананы, што Расея ў асобе прэзыдэнта Ўлаздімера Пуціна, адказных расейскіх партыяў шчыра жадае аб’яднаньня Расеі й Беларусі. У той самы час Аляксандар Лукашэнка вядзе падвойную гульню”, -- заявіў Нямцоў. “На словах Аляксандар Лукашэнка кажа пра братэрства і сяброўства, а насамрэч ні эканамічна, ні палітычна для аб’яднаньня Расеі й Беларусі нічога ня робіць”, -- сказаў ён.

Сваю думку Нямцоў матываваў тым, што Лукашэнка, "напрыклад падмануў Расею ў справе ўтварэньня адзінай валюты, якая павінна быць да 1 ліпеня". "Ён (Лукашэнка) падмануў Расею разам з "Газпромом" з стварэньнем газатранспартнага прадпрыемства. Парушыў абяцаньне выконваць эканамічнае заканадаўства, лібэралізаваць беларускую эканоміку, -- заявіў Нямцоў. – Расейскія кампаніі зь цяжкасьцю дапускаюцца ў Беларусь, адбываецца поўны падман расейскіх інвэстараў”.
Нямцоў абвінаваціў Лукашэнку ў правядзеньні антырасейскай палітыкі. “Лукашэнка займае адкрыта несумленную, крывадушную пазыцыю. На сёньня мы маем дэмакратычную Расею і несумленную і хлусьлівую дыктатуру Лукашэнкі. У нас розныя філясофія і ідэалёгія”, -- сказаў Нямцоў. "Драма ў тым, што Беларусь нам, безумоўна, блізкая, а мы яе бесталкова губляем", - адзначыў Нямцоў, паведамляе РІА "Новости".