Паклікай мяне за сабой :: Хартыя'97 :: Навiны

Звольнены з пасады віцэ-прэм’ера Аляксандар Папкоў, ужо амаль прызначаны куратарам “Дажынак”, пакорліва прыняў прапанову ачоліць Беларускі аграрна-тэхнічны ўнівэрсытэт, праседзіў на месцы рэктара ўсяго дзесяць дзён, і на мінулым тыдні прызначаны першым намесьнікам кіраўніка адміністрацыі прэзыдэнта. Лёс беларускага чыноўніка – умей чакаць і машчаць, пры якіх бы абставінах цябе ні здымалі з пасады. І на цябе не забудуць.

Аляксандар Папкоў, як ён сказаў у адным з інтэрвію «Белорусской газете», з дзяцінства працаваў на зямлі і выбар прафэсіі для яго («скажу без лишнего жеманства...») ня быў праблемай. Кар`еру пачынаў з пасады агранома ў адной з гаспадарак Магілёўскай вобласьці, старшыняваў у Шклоўскім райвыканкаме, а пасьля дарос да першага сакратара райкаму партыі. У пачтку 90-ых, у пэрыяд барацьбы паміж партсакратарамі за ўладу на месцах, Папкоў ваяваў за месца старшыні Шклоўскага райвыканкаму з тады яшчэ мала каму вядомым дэпутатам Вярхоўнага Савету Аляксандрам Лукашэнкам. І выйграў. А ў 1994 годзе выйграў Лукашэнка. Папкоў працягваў кар’еру чыноўніка раённага маштабу.

І тым ня менш менавіта яго Лукашэнка прызначыў віцэ-прэм’ерам, які будзе курыраваць сельскую гаспадарку. Вызнаючы ў гэтым і іншых кадравых рашэньнях адзін прынцып – выцягнуць чалавека з глыбінкі, прычым вельмі канкрэтнай і надзяліць яго непараўнальнай па маштабах Круглянскага раёну (там працаваў Папкоў да свайго віцэ-прэм’ерства) уладаю. А пасьля наладзіў праверку, накшталт той, якую прайшоў Папкоў, калі атрымаў абразьлівы наганяй на ўсю краіну за прыпіскі ( «Оставим за ним должность директора фестиваля «Дожинок». Пусть тащит воз».).

Адзінае, няма ніякіх гарантыяў, што з новай пасады Аляксандра Папкова ня здымуць зь ня менш гучным трэскам і па той самай прычыне.