Камуністы патрабуюць перагляду Закону “Аб масавых мерапрыемствах” :: Хартыя'97 :: Навiны

У дзяржаўных сродках масавай інфармацыі апублікаваны Закон Рэспублікі Беларусь “Аб масавых мерапрыемствах”. У ім утрымліваецца цэлая сыстэма мераў, накіраваных на абмежаваньне канстытуцыйных правоў грамадзянаў і іх грамадзкіх аб’яднаньняў. У сувязі з гэтым бюро Цэнтральнага Камітэту Партыі камуністаў Беларускай зьвяртае ўвагу грамадзкасьці краіны на “адкрыта антыдэмакратычны і антыканстытуцыйны” харатар Закону “Аб масавых мерапрыемствах” і рашуча пратэстуе супраць яго прыняцьця і яго моцы, што павінна адбыцца 29 жніўня.

На думку ПКБ, новы заканадаўчы акт – “яскравае сьведчаньне імкненьня Лукашэнкі і яго “нацыянальнага сходу” паставіць пад поўны кантроль выканаўчай “вэртыкалі” грамадзкі рух і грамадзянскія ініцыятывы, ігнараваньня імі Канстытуцыі Рэспублікі Беларусь і агульнапрызнаных дэмакратычных нормаў”.

Партыя камуністаў Беларуская патрабуе перагляду Закону “Аб масавых мерапрыемствах” і зьвяртаецца ў Канстытуцыйны суд з прапановаю даць аб’ектыўную юрыдычную ацэнку яго адпаведнасьці Асноўнаму закону краіны.

Адначасова з гэтым камуністы заклікаюць усіх прыхільнікаў дэмакратыі й сацыяльнага прагрэсу Бларусі падтрымаць іх у намаганьнях па супрацьдзеяньні палітыцы ўладзы, накіраванай на ўмацаваньне ў краіне аўтарытарызму, бюракратызму і прававога бязьмежжа.