Бацькі ліцэістаў будуць судзіцца з урадам :: Хартыя'97 :: Навiны

Суд Маскоўскага раёну Менску прыняў на разгляд скаргу бацькоў навучэнцаў Нацыянальнага дзяржаўнага гуманітарнага ліцэю імя Якуба Коласа (НДГЛ) аб незаконнасьці пастановы ўраду ад 25 чэрвеня сёлетнега году аб ліквідацыі навучальнай установы.

Як паведаміла БелаПАН намесьнік старшыні камітэту абароны ліцэю Рэгіна Зімніцкая, бацькі ліцэістаў лічаць дзеяньні ўраду неправамоцнымі, якія парушаюць правы бацькоў і іх дзяцей на атрыманьне адукацыі на беларускай мове і патрабуюць адмяніць пастанову ўраду аб ліквідацыі НДГЛ.

"Мы спадзяемся, што за месяц будзе прызначанае першае паседжаньне суда, - сказала яна. – Калі нам удасца адстаяць сваё права ў судовым парадку і будзе адмененая незаконная, безпадстаўная пастанова Савету міністраў, тады навучальная ўстанова застаецца ў сваім ранейшым дзяржаўным статусе. Мы не губляем надзеі, што суд праявіць мужнасьць і адновіць законнасьць”.

У гэтым выпадку, паводле Р.Зімніцкай, НДГЛ вернецца ў свой будынак, разьмешчаны па вул.Кірава,21.

“Калі ж суд не задаволіць наш зыск, тады прыйдзецца афармляць ліцэнзію на дзейнасьць недзяржаўнай навучальнай установы”, -- сказала яна.

Рэгіна Зімніцкая таксама паведаміла, што 28 жніўня адбудзецца апошні перад пачаткам новага навучальнага году бацькоўскі сход, на якім будзе абмяркоўвацца падрыхтоўка да надыходзячага Дня ведаў. “Мы павінны так яго арганізаваць, каб выключыць любыя правакацыі. Гэты дзень павінны стаць сьвятам для нашых дзяцей, пакрыўджаных ўладамі”, - сказала яна.

Ліцэісты, у сваю чаргу, плянуюць правесьці сёньня ў другой палове дня чарговую акцыю ў падтрымку сваёй навучальнай установы.

ddddd