Уладзімер Арлоў не ўпісаўся ў ідэалёгію :: Хартыя'97 :: Навiны

Дырэктарка рэдакцыйна-выдавецкай установы “Літаратура і Мастацтва” Таіса Бондар загадала прыбраць з апошняга нумару штотыднёвіка “Літаратура і Мастацтва” артыкул, прысьвечаны 50-м угодкам Уладзімера Арлова. Імя пісьменьніка было выкрэсьленае і з кнігі “Мы — беларусы”, якая рыхтуецца да друку.

Нумар газэты “Літаратура і Мастацтва”, падрыхтаваны пры дзейным удзеле адміністрацыі прэзыдэнта, з большага прысьвечаны пытаньням ідэалягічнай працы. У гэты ж нумар літаратурны крытык Ала Сямёнава на замову рэдакцыі падрыхтавала вялікі артыкул да юбілею Ўладзімера Арлова. Плянавалася гэтаксама надрукаваць фотаздымкі пісьменьніка разам з Васілём Быкавым і Рыгорам Барадуліным. Адметна, што артыкул быў прысьвечаны выключна літаратурнай дзейнасьці вядомага пісьменьніка, і ў ім ніяк не згадваліся ягоныя палітычныя погляды.

Як стала вядома Радыё Свабода, калі сёньня нумар газэты здаваўся ў друкарню, у ім не было артыкула пра Арлова.

Дырэктарка рэдакцыйна-выдавецкай установы “Літаратура і Мастацтва” Таіса Бондар не пажадала камэнтаваць гэтую сытуацыю для Радыё Свабода. Дарэчы, напярэдадні Таіса Бондар насіла ў адміністрацыю прэзыдэнта на ўзгадненьне гранкі кнігі “Мы — беларусы”, які выдае літаратурны холдынг. Як стала вядома радыё, у адміністрацыі загадалі выкрэсьліць з кнігі імя Ўладзімера Арлова.

Супрацоўнікі газэты “Літаратура і Мастацтва” зьвязваюць гэтыя падзеі з ўзмацненьнем гэтак званай ідэалягічнай працы ў літаратурнай сфэры. Тым больш, што яшчэ некалькі месяцаў таму выдадзеная нядаўна энцыкляпэдыя Ўладзімера Арлова “Краіна Беларусь” актыўна рэклямавалася на дзяржаўнай тэлевізіі.