Улады перасьледуюць журналістаў, якія дапамагалі «БДГ» :: Хартыя'97 :: Навiны

Тым часам, як “БДГ” спрабуе аднавіць выхад у сьвет, працягваецца перасьлед тых выданьняў, што дапамагалі “БДГ” падтрымліваць сувязь з чытачамі напрацягу трохмесячнага тэрміну забароны. Анатоль Вайцяхоўскі, выдавец баранавіцкай газэты “Шаг”, што надрукавала на сваіх старонках матэрыялы “БДГ”, атрымаў позву і першага верасня быў вымушаны наведаць Баранавіцкую гарадзкую пракуратуру.

Памочніца пракурора Зоя Жук паказала Анатолю Вайцяхоўскаму ліст з Генэральнай пракуратуры, які ўтрымлівае загад правесьці дэталёвую праверку газэты “Шаг”, прыняць меры пракурорскага рэагаваньня і дакласьці пра вынікі “наверх”. Але на просьбу зарэгістравацца ў кнізе ўліку рэвізій і праверак спадару Вайцяхоўскаму адмовілі.

Найперш пракратуру цікавіла, на якой падставе на старонках газэты “Шаг” зьявіліся напачатку жніўня матэрыялы “БДГ”. Тлумачэньні выдаўца, што гэта было зроблена ў знак журналісцкай салідарнасьці на безганарарнай аснове, правяраючых не задаволілі, і яны запатрабавалі прадставіць усю дакумэнтацыю. З дамоваў на друк і распаўсюд нават зьнялі ксэракопіі. Анатоль Вайцяхоўскі мяркуе, што гэта яшчэ будзе мець для яго пэўныя наступствы:

“Я думаю, што яны цяпер будуць рабіць усё магчымае, каб газэта не выходзіла, бо недарэмна адксэракапіравалі ўсе дамовы. Цяпер будуць па аднаму чалавеку выклікаць і перашкаджаць усялякім чынам распаўсюду газэты. На маю думку, вісіць пагроза і ўласна над “БДГ” - проста так яны ад яе не адчэпяцца.”

Між тым выданне спадара Вайцяхоўскага ўжо амаль месяц, як пазбаўленае магчымасьці друкавацца. Пасьля зьяўлення на старонках выданьня матэрыялаў “БДГ”, у сваіх паслугах спадару Вайцяхоўскаму адмовілі Слонімская, а затым і Нясьвіжская друкарні.