Дзень зачыненых газет :: Хартыя'97 :: Навiны

19 верасня Беларуская асацыяцыя журналістаў ладзіць "Дзень зачыненых газет" -- акцыю салідарнасці з журналістамі і СМІ, якія церпяць уціск за сваю прафесійную дзейнасць.

У межах "Дня" адбудзецца круглы стол на тэму "Сітуацыя са СМІ ў Беларусі і міжнародная салідарнасць журналістаў". У ім возьмуць удзел прадстаўнікі міжнароднай арганізацыі Артыкул 19, Інстытута масавай інфармацыі (Украіна), Цэнтра экстрэмальнай журналістыкі (Расія), рэдактары незалежных СМІ і кіраўніцтва БАЖ.

У канферэнц-залі гатэля "Беларусь" пройдзе вечарына, падчас якой прадстаўнікі расійскага "Первого канала" ўручаць прэмію Дзмітрыя Завадскага -- беларускага аператара тэлеканала ОРТ, зніклага без вестак тры гады таму. Сёлета лаўрэатамі стануць фотакарэспандэнты інфармацыйных агенцтваў Associated Press і Reuters Сяргей Грыц і Васіль Фядосенка, а таксама рэдакцыя "Белорусской деловой газеты".

Акрамя таго, у праграме дня салідарнасці -- выстава фотастэндаў, падрыхтаваных рэдакцыямі зачыненых выданняў, выступы замежных гасцей, ток-шоў з удзелам галоўных рэдактараў беларускіх медыяў, выступы музыкаў Лявона Вольскага, Піта Паўлава, Дзмітрыя Бартосіка.

"Мэта нашай акцыі - прадэманстраваць салідарнасць і падтрымаць калег, якія апынуліся ў цяжкім становішчы, -- кажа старшыня Беларускай асацыяцыі журналістаў Жанна Літвіна. -- Толькі за апошнія 2 гады з прычыны прамога ўмяшання ўладаў альбо пад уплывам дыскрымінацыйнай эканамічнай палітыкі ў нашай краіне знікла каля 2 дзесяткаў недзяржаўных медыяў".