Скарачэнні штату на Гомельскім тэлерадыёаб`яднанні :: Хартыя'97 :: Навiны

На Гомельскім абласным тэлерадыёаб`яднанні пачаліся скарачэнні. Нягледзячы на тое, што, паводле працоўнага заканадаўства, супрацоўнікі мусяць быць праінфармаваны пра звальненне за два месяцы, для большасці з іх гэта стала нечаканасцю.

Аператар тэлерадыёаб`яднання Андрэй Хруліндзік быў папярэджаны пра звальненне за два тыдні. Рэжысёр Людміла Шастакова даведалася пра сваё звальненне 16 верасня ад бухгалтара: ён папрасіў яе атрымаць разлік, паколькі з заўтрашняга дня "яна ўжо не працуе". На рашэнне кіраўніцтва тэлерадыёаб`яднання не паўплывала тое, што напярэдадні ў эфір выйшлі 7 перадач спн. Шастаковай - у тым ліку інтэрвью са старшынём Гомельскага аблвыканкама Аляксандрам Якабсонам.

З шэрагам супрацоўнікаў не будуць працягнутыя працоўныя кантракты. Наталля Бабарыкіна, у якой працоўны кантракт мае тэрмін 6 месяцаў, нядаўна даведалася ад юрыста, што гэты дакумент быў несапраўдны: такія пагадненні заключаюцца тэрмінам мінімум на 1 год.

З інфармацыі службы маніторынга БАЖ па Гомельскай вобласці, толькі на першым этапе штатнага скарачэння з Гомельскага тэлерадыёаб`яднання будуць звольненыя 36 супрацоўнікаў са 160. У іх ліку - 12 журналістаў, а таксама рэжысёры, іх асістэнты, гукарэжысёры, аператары, мастакі, рабочыя пастановачнага цэху і студыйныя.

Ніякіх крокаў па абароне сваіх правоў супрацоўнікі тэлерадыёаб`яднання рабіць не збіраюцца.

Мяркуецца, што наступны этап звальненняў адбудзецца пасля 1 студзеня 2004 года.