Настаўнікаў прымушаюць падпісвацца на дзяржаўныя газэты :: Хартыя'97 :: Навiны

Сябры Рады магілёўскага грамадзкага аб’яднаньня "Новая зямля" выказваюць заклапочанасьць узмацненьнем ціску на пэдагогаў з боку кіраўніцтва сярэдніх навучальных установаў рэгіёну. На думку грамадзкіх актывістаў, кампанія прымусовай падпіскі настаўнікаў рэгіёнаў на афіцыёзны друк — яшчэ адно наступства ідэалягізацыі грамадзкай думкі Беларусі.

Так, у сярэдняй школе вёскі Буйнічы (Магілёўскі раён) дырэктарка падчас выдачы заробку настойліва "дае зразумець" настаўнікам, што неабходна аформіць падпіску на "Прыдняпроўскую ніву", трыбуну мясцовай "вэртыкалі". Як кажуць сябры аб’яднаньня, гэта не адзінкавы выпадак.

"Адмовіцца складана, бо афіцыйна нібыта ніхто не прымушае, — кажа старшыня "Новай зямлі", настаўнік Андрусь Кавалёў. — Няма ніякіх пісьмовых загадаў. Адміністрацыя школы проста "просіць" падпісацца. Галоўны аргумэнт: вы ж таксама нешта некалі можаце папрасіць".

На думку сябраў "Новай зямлі", прымусовая падпіска, якая парушае правы настаўнікаў, — гэта мясцовыя наступствы агульнакраёвай кампаніі па ідэалягізацыі грамадзтва. Таму актывісты аб’яднаньня маюць намер як мінімум інфармаваць тых жа настаўнікаў аб незаконнасьці падобных дзеяньняў з боку кіраўніцтва навучальных установаў.