«Дэпутатам» паабяцалі бясплатны побыт на Кубе :: Хартыя'97 :: Навiны

У Менск з Масквы прыляцела з афіцыйным візытам дэлегацыя кубінскіх дэпутатаў на чале з намесьнікам старшыні так званай “Нацыянальнае асамблеі народнай улады”. Кубінскую дэлегацыю ачольвае Хаймэ Альбэрта Крамбэт Эрнандэс-Бакера. Апошнія 10 гадоў ён працуе намесьнікам старшыні так званае “Нацыянальнае асамблеі народнай улады”, якая рэгулярна пераабірае старшынём дзяржаўнай рады Кубы Фідэля Кастра.

У складзе кубінскай дэлегацыі толькі тры дэпутаты. Адметна, што групу па сувязях з парлямэнтам Кубы ў «палаце прадстаўнікоў» ачольвае камуніст Сяргей Касьцян. Зварот да сьпікера Вадзіма Папова спадар Крамбэт пачаў гэтак: “Таварыш старшыня!”

Сярод іншага, спадар Крамбэт прапанаваў усім беларускім «дэпутатам» наведаць Рэспубліку Кубу:

“Вы самі можаце выбраць сабе час, структуру і склад дэлегацыі. Натуральна, усе выдаткі на вашае знаходжаньне на Кубе мы возьмем на сябе”.

Хаймэ Крамбэт адрасаваў гэтую прапанову таксама верхняй палаце «нацыянальнага сходу». У панядзелак, як паведамляе Радыё Свабода, у «савеце рэспублікі» кубінцы падпішуць пратакол пра супрацоўніцтва зь беларускімі калегамі.