«Прававая дапамога насельніцтву» ліквідаваная канчаткова, лёс «Ратушы» незразумелы :: Хартыя'97 :: Навiны

13 кастрычніка Вярхоўны суд Рэспублікі Беларусь пакінуў у сіле рашэньне Менскага гарадзкога суда, паводле якога было ліквідаванае грамадзкае аб`яднаньне "Прававая дапамога насельніцтву". Цяпер сябры ліквідаванага аб`яднаньня будуць вымушаныя аказваць прававую дапамогу насельніцтву ва ўласных кватэрах. Тым часам лёс грамадскага аб’яднання "Ратуша" застаецца незразумелым.

Калегія судзьдзяў на чале з судзьдзёй Жукоўскай і пракурор Арцюшэнка прызналі парушэньні, дапушчаныя грамадзкім аб`яднаньнем, грубейшымі за парушэньні, дапушчаныя супрацоўнікамі Міністэрства юстыцыі і Менскім гарадзкім судом.

Галоўнае абвінавачваньне, прад`яўленае арганізацыі, - ажыцьцяўленьне незаконнай камэрцыйнай дзейнасьці, якое так і не было даказанае галоўнымі спэцыялістамі Ўпраўленьня грамадзкіх аб`яднаньняў Міністэрства юстыцыі сп.Харытонам і спн.Бондар.

Сёньняшні працэс у адрозьненьне ад суда першай інстанцыі быў адкрыты. Але рашэньне Вярхоўнага суда таксама не задаволіла прадстаўнікоў грамадзкага аб`яднаньня - Алег Воўчак ня мае намеру спыняць аказаньне прававой дапамогі грамадзянам. Па словах сп.Воўчака "цяпер прававую дапамогу мы будзем аказваць на маёй кухні за кубачкам кавы ці гарбаты".

Сёньня ж Вярхоўны суд пачаў працэс па касацыйнай скарзе Гарадзенскага абласнога грамадзкага аб`яднаньня "Ратуша" на рашэньне Гарадзенскага абласнога суда аб ліквідацыі грамадзкага аб`яднаньня. Пры азнаямленьні з матэрыяламі справы пракурор заўважыў, што ў пратаколе паседжаньня Гарадзенскага абласнога суда адсутнічае подпіс судзьдзі. Таму вынясеньне рашэньня Вярхоўнага суда адкладзенае да выпраўленьня парушэньняў, на няпэўны тэрмін.