Праваабаронцаў розных краінаў непакоіць сітуацыя ў Беларусі :: Хартыя'97 :: Навiны

Праваабаронцы з Расеі, Украіны, Польшчы, Таджыкістану, Арменіі, Кыргызстану, Казахстану і інш. краінаў СНД днямі прынялі адмысловую заяву аб палажэньні праваабаронцаў у Беларусі. Заява будзе скіраваная ў Бюро па дэмакратычных інстытутах і правах чалавека Арганізацыі па бясьпецы і супрацоўніцтве ў Эўропе, прадстаўніцтва Генэральнага сакратара ААН па праваабаронцах, у Вярхоўны суд Беларусі, прэзыдэнту і міністру юстыцыі Беларусі.

У заяве праваабаронцы зьвяртаюць ўвагу на тое, што ліквідацыя няўрадавых арганізацыяў у Беларусі пагражае "праваабарончым арганізацыям, якія займаюцца маніторынгам парушэньняў правоў чалаека, аказваюць прававую дапамогу грамадзянам". Праваабаронцы выказваюць сумнеў у юрыдычнай абгрунтаванасьці ліквідацыі праваабарончых грамадзкіх аб`яднаньняў і лічаць, "што дзейнасьць гэтых арганізацыяў спрыяе пабудове дэмакратычнай прававой дзяржавы і ўяўляюць сабой важную гарантыю захаваньня правоў чалавека".

У сувязі з абмежаваньнем права грамадзянаў Беларусі на ўдзел у асацыяцыях падпісанты зьвяртаюць увагу ААН і АБСЭ на палажэньне праваабаронцаў ў Беларусі і просяць улічыць гэту акалічнасьць. Да таго ж праваабаронцы заклікаюць прэзыдэнта і ўрад Беларусі дзеля выкананьня рэзалюцыі Камісіі па правах чалавека ААН як хутчэй запрасіць у краіну прадстаўніка Генэральнага сакратара ААН па праваабаронцах Хіну Джылані, паведамляе сайт www.belngo.info.