Дэпутата пазбаўляюць магчымасцi працаваць з выбаршчыкамi :: Хартыя'97 :: Навiны

Учора дэпутат Гомельскага гарсавета Юрый Глушакоў быў афiцыйна пазбаўлены памяшкання, дзе ў яго рэгулярна адбывалiся спатканнi з выбаршчыкамi. Глушакоў перакананы, што такiм чынам гомельскiя ўлады хочуць пазбавiць яго магчымасцi працаваць з насельнiцтвам.

Адразу пасьля абрання дэпутатам Глушакоў звярнуўся да кiраўнiцтва адмiнiстрацыi Цэнтральнага раёну Гомеля з просьбай дапамагчы знайсцi памяшканне, дзе б ён мог весцi прыём сваiх выбаршчыкаў. У другой палове сакавiка Глушакову было выдзелена месца ў файе вучэбна-метадычнага цэнтра Гомельскага абласнога аб’яднання прафсаюзаў. Тут два разы на тыдзень дэпутат вёў прыём людзей па асабiстых справах. У афiцыёзнай газэце “Гомельскiя ведамасцi” была нават надрукавана даведка аб тым, што Юрый Глушакоў вядзе прыём грамадзянаў у вучэбна-метадычным цэнтры. За час, якi мiнуў з моманту абрання, да Глушакова за дапамогай звярнулася больш за 100 чалавек.

На мiнулым тыднi да дэпутата дайшла iнфармацыя, што яго хочуць пазбавiць гэтага памяшкання.

- Па сваiх каналах мне ўдалося даведацца, што на кiраўнiцтва цэнтра выходзiлi людзi з КГБ i патлумачылi, што ў iхным памяшканнi я рэгулярна праводжу падрыўную працу з насельнiцтвам, - гаворыць Юрый Глушакоў.

Учора Павел Лычкоўскi, дырэктар вучэбна-метадычнага цэнтру Гомельскага абласнога аб’яднання прафсаюзаў, у размове з Глушаковым заявiў, што дэпутат больш не можа карыстацца памяшканнем.

- Фактычна ён цалкам падцвердзiў тую iнфармацыю, якая ў мяне ўжо была, - гаворыць Глушакоў.

Павал Лычкоўскi ў размове з карэспандэнтам ПАГОНI адмовiўся ад каментароў па гэтай справе, але падкрэсьлiў, што ў яго асабiста не было нiякiх заўвагаў да таго, як дэпутат выкарыстоўваў гэтае памяшканне.

- Цяпер я вымушаны шукаць iншае месца. Але, хутчэй за ўсё, з гэтым будуць складанасцi. КГБ умее iх ствараць. Але ад непасрэдных кантактаў з выбаршчыкамi я адмаўляцца не збiраюся, - заявiў ПАГОНI Юрый Глушакоў.

Юрый Глушакоў з’яўляецца адзiным незалежным дэпутатам у Гомельскiм гарсавеце.