Дзесяць вадзiцеляў таксi далучылiся да галадоўкi ваўкавыскага прадпрымальнiка :: Хартыя'97 :: Навiны

Дзесяць вадзiцеляў ваўкавыскага “Радыётаксi 22222” абвесцiлi сёння галадоўку ў знак салiдарнасцi са сваiм працадаўцам Мiкалаем Аўтуховiчам. Iндывiдуальны прадпрымальнiк не прымае ежу ўжо пяты дзень, пратэстуючы такiм чынам супраць затрымання падаткавымi органамi трынаццацi ягоных аўтамабiляў.

Заўтра спаўняецца тыдзень, як 60 супрацоўнiкаў “Радыётаксi 22222” засталiся без працы. Iнспекцыя падаткавага камiтэта па Гродзенскай вобласцi ў мiнулы чацьвер затрымала 11 з 18 таксовак Мiкалая Аўтуховiча, а таксама мiкрааўтобус i машыну-эвакуатар у заклад за штрафныя санкцыi памерам 273 мiльёны рублёў, налiчаныя за парушэнне прадпрымальнiкам касавых аперацыяў.

Сам прадпрымальнiк сваю вiну не прызнае, гаворыць, што яго такiм чынам проста запалохваюць за тое, што ён уступiў у канфрантацыю з мясцовымi ўладамi.

- Мне кажуць: ты нiчога не дакажаш, ты проста “патрапiў пад каток”, - гаворыць Мiкалай Аўтуховiч. – Адна з супрацоўнiц Гродзенскай падаткавай службы мне адкрытым тэкстам сказала: “Я веру, што вы нiчога не скралi, але гэтую сiстэму вы не пераможаце”.

Галодоўшчыкi ўвесь час знаходзяцца ў офiсе “Радыётаксi 22222”. Гавораць, што не выйдуць адтуль, пакуль Мiкалаю Аўтуховiчу не вярнуць ягоныя аўтамабiлi. Паводле iнфармацыi Iнспекцыi падаткавага камiтэта па Гродзенскай вобласцi, затрыманыя машыны будуць знаходзіцца на мiлiцэйскай стаянцы ў Ваўкавыску да таго часу, пакуль не скончыцца праверка дзейнасцi прадпрымальнiка. Затым iх лёс будзе вырашаць суд.