Газэту «Навінкі» адмовіліся друкаваць усе менскія друкарні :: Хартыя'97 :: Навiны

Газету “Навiнкi” адмовiлiся друкаваць усе менскiя друкарнi. Пра гэта сёння паведамiў ПАГОНI галоўны рэдактар выдання Паўлюк Канавальчык.

Па словах Канавальчыка, усе друкарнi, куды ён звяртаўся, спасылаюцца на вялiкую занятасць. Адмовiла “Навiнкам” i друкарня “Чырвоная зорка”, з якой у рэдакцыi заключана дамова.

- Мне патлумачылi, што нас няма ў планах на чацьвёрты квартал, i таму яны нас друкаваць не будуць. Але на пачатку верасня я меў размову з дырэктарам друкарнi i папярэдзiў яго аб тым, што ў кастрычнiку выходзiць наш новы нумар, - гаворыць Паўлюк Канавальчык.

Цяпер рэдакцыя газэты “Навiнкi” мае намер абскардзiць у судзе адмову друкарнi выконваць дамову. Адначасова Канавальчык працягвае шукаць друкарню, якая пагадзiлася б выдрукаваць новы нумар газеты.

- Сёння мы пазбаўлены магчымасцi выходзiць, i гэта пры тым, што тэрмiн папярэджання ўжо скончыўся. Фактычна ўлады такiм чынам зачыняюць легальна iснуючае выданне, - гаворыць Паўлюк Канавальчык.

Галоўны рэдактар “Навiнак” не выключае, што ў Беларусi не знойдзецца нiводнай друкарнi, якая зацiкавiцца супрацоўнiцтвам з яго газетай.

Газета “Навiнiкi” была заснавана ў лютым 1998 года i амаль год выдавалася нелегальна. Дзяржаўную рэгiстрацыю “Навiнкi” атрымалi ў лютым 1999 годзе. У маi 2003 года газэта атрымала два папярэджання ад Мiнiстэрства iнфармацыi i яе выхад быў прыпынены на тры месяцы.