Ліквідуюць гомельскае аб`яднаньне «Ініцыятыва» :: Хартыя'97 :: Навiны

Упраўленьне юстыцыі Гомельскага аблвыканкаму падала зыск у абласны суд аб ліквідацыі Гомельскага абласнога грамадзкага жаночага аб`яднаньня "Ініцыятыва". Пра гэта паведаміла старшыня аб`яднаньня Галіна Скараход, якая атрымала павестку зьявіцца на размову ў суд 20 кастрычніка.

Па словах Галіны Скараход, зыскавая заява ёй не дасланая: "Відавочна, мне дадуць яе ў судзе падчас размовы". Пакуль жа кіраўнік толькі мяркуе пра магчымыя прычыны ліквідацыі "Ініцыятывы". Адным з парушэньняў, за якое аб`яднаньне атрымала пісьмовае папярэджаньне ў жніўні гэтага году, стала разьмяшчэньне яе юрыдычнага адрасу ў жылым доме. Паводле ўказаньняў упраўленьня юстыцыі, спн.Скараход знайшла новае памяшканьне пад юрыдычны адрас у вёсцы Яроміна, што ў прыгарадзе Гомеля.

Увесь пакет дакумэнтаў старшыня перадала на разгляд у выканкам Гомельскага раёну, дзе ёй паведамілі, што дакумэнты будуць разглядацца на паседжаньні 23 верасьня. "Я паведаміла пра гэта ва ўпраўленьне. І праз некалькі дзён атрымала адтуль ліст, дзе паведамлялася, што калі да 23 верасьня я не прадстаўлю новы юрадрас, то да аб`яднаньня будуць ужытыя меры ўзьдзеяньня", - кажа спн.Скараход.

Але ні 23 верасьня, ні зараз выканкам Гомельскага раёну не прыняў рашэньне па просьбе ГА "Ініцыятыва". "Фактычна "вэртыкаль" падвяла наша аб`яднаньне пад ліквідацыю", - адзначыла старшыня.