Улады ціснуць на «Местную Газету» :: Хартыя'97 :: Навiны

Сёння рэдактар ваўкавыскага незалежнага выдання “Местная Газета” Андрэй Шантаровіч атрымаў ліст ад міністра інфармацыі Уладзіміра Русакевіча ў якім газета папярэджваецца аб магчымай ліквідацыі. На думку Шантаровіча гэта помста ўладаў за асвятленне “Местнай газетай” канфлікту ваўкавыскага прадпрымальніка Мікалая Аўтуховіча з падаткавай інспекцыяй.

- Мяне папярэдзілі, што ў выпадку калі размяшчэнне юрыдычнага адрасу газеты на працягу месяца не будзе ўзгоднена з ваўкавыскімі ўладамі, то газета будзе ліквідавана, - гаворыць Андрэй Шантаровіч.

Юрыдычны адрас “Местнай газеты” першапачаткова быў у Смаргоні. Потым рэдакцыя перамесцілася ў Ваўкавыск.

- У такім выпадку я павінен толькі паведаміць уладам пра змену адраса. Гэта і было зроблена. Таму з юрыдычнага пункту гледжання ніякіх парушэнняў у нас няма, - лічыць Шантаровіч.

Галоўны рэдактар “Местнай Газеты” разглядае рашэнне Міністэрства Інфармацыі як помсту газэце за асвятленне канфлікту мясцовага прадпрымальніка Мікалая Аўтуховіча з падаткавай інспекцыяй. На працягу першага тыдня галадоўкі Шантаровіч фактычна выконваў абавязкі прэсавага сакратара галадуючых і ў многім дзякуючы яго намаганням справа патрапіла на першыя старонкі дзяржаўных і недзяржаўных СМІ.

Цяпер галоўны рэдактар рыхтуе адказ міністру інфармацыі, але не выключае, што яму прыйдзецца даводзіць сваю правату ў судзе.

- Канешне, яны так зробяць як з Аўтуховічам. Спачатку зачыняць газету, каб потым я ў судзе апраўдваўся, - гаворыць Шантаровіч.

Нагадаем, што прыватны прадпрымальнік Мікалай Аўтуховіч і 26 яго супрацоўнікаў працягваюць галадоўку пратэсту. Галадоўшчыкі пратэстуюць такім чынам супраць незаконных на іх думку дзеянняў падаткавай інспекцыі, якая арыштавала 13 аўтамабіляў Аўтуховіча. У выніку гэтага працу страціла па розных ацэнках ад 30 да 60 чалавек.