Менгарсуд лiквiдуе незалежных юрыстаў :: Хартыя'97 :: Навiны

5 лістапада Менскi гарадскi суд адмовiў Незалежнаму таварыству прававых даследаванняў у задавальненнi iска па адмене двух папярэджанняў. Старшыня таварыства Алена Танкачова заявiла, што "дэ-юрэ - гэта яшчэ не лiквiдацыя арганiзацыi, але дэ-факта - лiквiдацыя". Цягам апошнiх 5 гадоў таварыства абараняла ў судах каля 40 недзяржаўных арганiзацыяў.

Незалежнае таварыства прававых даследаванняў атрымала ад упраўлення юстыцыi Менгарвыканкама два пiсьмовыя папярэджаннi. Першае, вынесенае за тое, што нiбыта кiраўнiк НТПД Алена Танкачова i сябра ўправы Смалянка перашкаджалi чыноўнiкам упраўлення юстыцыi правяраць дзейнасць грамадскай арганiзацыi “Некст стоп нью лайф”. Перашкодаю чыноўнiкi лiчаць тэлефонную гаворку Алены Танкачовай з прадстаўніком Мінюсту Аляксандрам Харытонам у час, калi чыноўнiк упраўлення юстыцыi спрабаваў атрымаць у прадстаўнiка арганiзацыi “Некст стоп нью лайф” увесь комплекс дакументаў на праверку арганiзацыi.

Другое папярэджанне НТПД атрымала за матэрыял сябра ўправы таварыства Смалянкi пад назвай “Парадак правядзеньня праверак рэгiструючымi органамi”, надрукаваны ў бюлетэнi незарэгiстраванай у Мiнюсце Асамблеi дэмакратычных няўрадавых арганiзацыяў. У артыкуле аналiзаваўся парадак правядзення праверак грамадзкiх арганiзацыяў. Упраўленне юстыцыi Менгарвыканкама ўбачыла ў артыкуле парушэнне Кодэкса аб адмiнiстратыўных правапарушэньнях.

Нязгоднае з папярэджаннямi, якiя даюць права Мiнюсту iнiцыяваць судовую лiквiдацыю арганiзацыi, кiраўнiцтва НТПД абскардзiла папярэджаннi ў Менскiм гарсудзе. Аднак 5 лiстапада суд, грунтуючыся на паказаннях выключна прадстаўнiкоў дзяржаўных органаў (прадстаўнiкоў Мiнюста Харытона, Бондар i супрацоўнiка ўпраўлення юстыцыi Менгарвыканкама Шчарбовiч), не задаволiў патрабаваннi аб адмене папярэджанняў.