ЗУБР задае пытанні баранавіцкім уладам :: Хартыя'97 :: Навiны

Увечары 13 лістапада ля гарвыканкама і вакзалу Баранавічаў з`явіліся графіці, адрэсававныя старшыні мясцовага выканкама Віктару Дзічкоўскаму: "Дичковский, убери мусор" і "Дичковский, где горячая вода?". Як паведамляе прэс-служба руху ЗУБР, менавіта гэтыя пытанні найбольш хвалююць жыхароў гораду згодна з апытаннямі, праведзенымі мясцовай незалежнай газетай "Intex-press".

Па словах актывістаў ЗУБРа з Баранавічаў, гэтай акцыі папярэднічала сустрэча старшыні гарвыканкама з моладзю. На ёй прысутнічалі каля 200 чалавек. Сярод іх былі студэнты чатырох вышэйшых навучальных установаў гораду - Інстытута Правазнаўства, Баранавіцкага Дзяржаўнага вышэйшага педагагічнага каледжу, баранавіцкіх філіялаў БНТУ і Брэсцкага дзяржаўнага ўніверсітэту, а таксама прадстаўнікі ўсіх сярэдніх спецыяльных навучальных установаў (тэхнічнага каледжу, каледжу лёгкай прамысловасці, медыцынскай вучэльні і інш.). Акрамя навучэнцаў былі запрошаныя працоўныя прамысловых прадпрыемстваў. Сустрэча была арганізаваная Гарадскім студэнцкім камітэтам і гарвыканкамам.

Нягледзячы на строгі адбор, на яе змаглі патрапіць і некалькі актывістаў ЗУБРа. Яны задалі мэру Баранавічаў шэраг пытанняў, якія хвалююць не толькі моладзь, але і іншых жыхароў гораду. Сярод іх - аб колькасці новых дамоў і магчымасці атрымаць кватэры ў іх, аб магчымасці для студэнтаў уладкавацца на працу пасля вучобы і іншыя. Нажаль старшыня гарвыканкаму так і не змог дакладна адказаць на гэтыя пытанні і сказаць, калі ў горадзе будуць адрамантаваныя дарогі і прыбранае смецце з некаторых вуліцаў.

Замест адказу Віктар Дзічкоўскі спаслаўся на злачынцаў, якія быццам бы перыядычна псуюць дарогі і ствараюць кучы смецця ў цэнтры гораду. Таму, не дачакаўшыся адказу ад кіраўніка мясцовай улады, зубры задалі тыя ж самыя пытанні іншым чынам. Калі гэта не паўплывае на дзейнасць гарадскіх уладаў, акцыі на сацыяльную тэматыку будуць працягвацца. Белоруссия