На Гомельшчыне за год перарэгістравалася толькі 5% рэлігійных суполак :: Хартыя'97 :: Навiны

Амаль за год, што мінуў пасьля прыняцьця ў Беларусі новага закону “Аб свабодзе сумленьня і рэлігійных арганізацыях”, у Гомельскай вобласьці перарэгістравалася меней за 5% рэлігійных суполак і грамадаў. 14 лістапада прэзыдыюм абласнога Савету абавязаў мясцовыя прадстаўнічыя і выканаўчыя органы прысьпешыць перарэгістрацыю.

У рэлігійных суполках ёсьць шмат прычынаў ігнараваць перарэгістрацыю.

Многія прадстаўнікі пратэстанцкіх суполак цалкам адмоўна ставяцца да новага закону, паводле якога рэгіструюцца толькі буйныя абшчыны і адмаўляецца ў рэгістрацыі малалікім.

“Я не прыхільнік такіх сьвецкіх законаў,” – паведаміў Радыё Свабода сьвятар рэчыцкай суполкі “Сьведкі Іяговы” Сьцяпан Лугоўскі.

Аднак асноўная прычына таго, што рэчыцкія вернікі не сьпяшаюцца ісьці на перарэгістрацыю, – гэта канфлікт з райвыканкамам. Апошні не дазваляе будаваць лекцыйную залю на той падставе, што чыноўнікі разглядаюць яе як культавы будынак.

У каталікоў – іншая праблема. Большасьць ксяндзоў у рэгіёне прыехалі з Польшчы. Яны ня бралі беларускага грамадзянства. А паводле новага закону замежнаму ксяндзу нельга ўзначальваць раду каталіцкай грамады, якую ў каталікоў і праваслаўных традыцыйна ўзначальвае сьвятар.

Многія рэлігійныя суполкі, праваслаўныя ў першую чаргу, спасылаюцца на адсутнасьць узаконенага зямельнага надзелу пад бажніцамі.

Усё гэта і зьявілася прычынай таго, што за ўвесь год па прыняцьці закону зарэгістраваліся толькі 15 рэлігійных грамадаў з існуючых 321.

Прэзыдыюм аблсавету прыняў рашэньне завяршыць перарэгістрацыю рэлігійных грамадаў да ліпеня наступнага году, нават не чакаючы апошняга лістападаўскага тэрміну.
Минск, Белоруссия