У Менск зноў прыехаў дакладчык ПАРЭ :: Хартыя'97 :: Навiны

Адмысловы дакладчык палітычнага камітэту Парлямэнцкай асамблеі Рады Эўропы Хрыстас Пургурыдэс, які ў пачатку лістапада ўжо наведаў Менск, дасьледуючы сытуацыю са справамі зьніклых, зноў прыехаў у Беларусь. Сёння мы змяшчаем на нашым сайце эксклюзіўнае інтэрвію Хрыстоса Пургурыдэса, якое ён даў Радыё Свабода.

-- Якая мэта гэтага, ужо другога за месяц Вашага візыту сюды?

-- Я – дакладчык палітычнага камітэту Парлямэнцкай асамблеі Рады Эўропы на тэму "Перасьлед прэсы ў Беларусі". Таму я знаходжуся тут, каб вывучыць сытуацыю, якая датычыць прэсы, увогуле сродкаў масавай інфармацыі, усталяваць факты й зрабіць справаздачу палітычнаму камітэту, а потым усёй Парлямэнцкай асамблеі.

-- З кім Вы зьбіраецеся сустрэцца тут і якія Вашы чаканьні?

-- Я пляную сустрэцца зь міністрам інфармацыі, парлямэнтарамі, некаторымі прэзыдэнцкімі дарадцамі, вядома ж, са шмат якімі журналістамі, а таксама прадстаўнікамі грамадзкасьці. Чаго я чакаю – гэта цяжкае пытаньне, каб на яго адказаць. Я застаюся адкрытым для інфармацыі да таго, як зрабіць канчатковыя высновы, але магу сказаць вам у самым пачатку, што сытуацыя наконт сродкаў масавай інфармацыі ня ёсьць здавальняючай.

-- Вы таксама рыхтуеце іншую справаздачу – пра зьніклых. Калі Вы мяркуеце зрабіць абедзьве справаздачы перад Парлямэнцкай асамблеяй Рады Эўропы?

-- Я працую і над той справаздачай. Як вы здагадваецеся, гэта даволі складанае пытаньне. Як чакаецца, гэта будзе даволі доўгая справаздача. Я пляную прадставіць яе да канца году альбо – самае позьняе – на першым тыдні студзеня”.

-- Але першай Вы будзеце рабіць справаздачу пра стан свабоды прэсы ў Беларусі, так? І ці атрымаецца ў Вас паразмаўляць з тымі, каго Вы ня здолелі пабачыць у пачатку лістапада ў справе зьніклых?

-- Я буду. Я папрасіў сустрэчаў зь некалькімі людзьмі. Я папрасіў пра сустрэчу са спадаром Паўлічэнкам, з асуджанымі за выкраданьне спадара Завадзкага. Мы напісалі адпаведныя лісты міністру ўнутраных справаў і генэральнаму пракурору з запытам наконт гэтых сустрэчаў. Спадзяюся, што мне ўдасца.

-- Якія ў Вас уражаньні ад Менску ды яго жыхароў?

-- Горад даволі чысты й прыгожы. Людзі вельмі ветлівыя, яны могуць падабацца. Але ў мяне склалася ўражаньне, што яны ня вельмі зацікаўленыя ў палітыцы, тутэйшыя людзі. Яны не даюць знакаў, што яны цікавяцца тым, як кіруюць іх краінай.

-- Вы гуляеце па Менску адзін – не баіцеся?

-- Чаму я мушу баяцца? Я раблю працу, якая будзе служыць народу Беларусі. Я зраблю ўсё, што ў маіх сілах, каб дапамагчы народу Беларусі. І таму мне ня трэба хвалявацца наконт гэтага. Насамрэч, калі вы сустрэлі мяне, я йшоў з праваслаўнай царквы, дзе я наведваў службу. Служба йшла, вядома, па-расейску, але яна была такая ж, як і ў грэцкай царкве. Мне спадабалася – гэта быў вельмі прыгожы досьвед. Белоруссия