Без Быкава... :: Хартыя'97 :: Навiны

Гарадзенскi Бульвар Ленiнскага Камсамола не будзе перайменаваны ў Бульвар Васiля Быкава. Такое рашэнне прыняў Гарадзенскi гарвыканкам. У адмове, атрыманай 16 снежня Сяргеем Антусевiчам, дэпутатам Гарадзенскага гарадскога Савета дэпутатаў, гарвыканкам спасылаецца на ранейшыя рашэннi мясцовых дэпутатаў, паводле якiх перайменаванне вулiц у Гродне прыпыненае.

Лiсты з прапановамi па ўшанаваннi памяцi Васiля Быкава былi накiраваныя ў гарвыканкам напачатку лiстапада бягучага года. Подпiсы пад прапановамi паставiлi больш за 500 гарадзенцаў. Каля сотнi падпiсантаў - гэта гарадзенскiя лiтаратары, мастакi, навукоўцы, спартоўцы, вядомыя людзi, якiя ствараюць iмя гораду ў Беларусi i свеце.

У звароце да гарадскога кiраўнiцтва, мiж iншага, адзначалася: “Творчае жыццё пiсьменнiка, на кнiгах якога выхоўваецца ўвесь цывiлiзаваны свет, можа i павiнна стаць прыкладам выхавання чалавечай годнасцi, духоўнасцi, прафесiйнай адказнасцi перад самiм сабой. Час не абясцэнiць вялiкай лiтаратуры. Кнiгi Васiля Быкава, як i кнiгi Вiльяма Шэкспiра i Льва Талстога, будуць чытаць. ”

Каментуючы pahonia.promedia.bу адмову гарвыканкама, Сяргей Антусевiч, дэпутат ад партыi БНФ, назваў рашэнне гарадскiх чыноўнiкаў пагардай у адносiнах да беларускай элiты:

- Гэта беспрэцэдэнтны выпадак. Фактычна ўсе прадстаўнiкi гарадзенскай iнтэлiгенцыi, людзi перад заслугамi якiх варта схiлiць галовы, аб’ядналiся вакол ганаровай справы – ушанавання памяцi Васiля Быкава. Адмова чыноўнiкаў – гэта, мякка кажучы, непавага да зробленага славутымi гарадзенцамi.