Прыняцце новага закона аб СМІ адкладаецца :: Хартыя'97 :: Навiны

Юрысты ГА "Беларуская асацыяцыя журналістаў" лічаць, што праект закона "Аб унясенні змяненняў і дапаўненняў у Закон РБ "Аб друку і іншых сродках масавай інфармацыі" будзе вынесены на разгляд веснавой сесіі “палаты прадстаўнікоў” (у красавіку-чэрвені 2004 года). Пра неабходнасць тэрміновага прыняцця гэтага дакумента неаднаразова заяўляў кіраўнік дзяржавы, аднак законапраект, адпраўлены на дапрацоўку яшчэ 2 кастрычніка, так і не паступіў на разгляд "дэпутатаў". Восеньская сесія ПП НС, між тым, скончылася 19 снежня.

У бліжэйшы час ГА "Беларуская асацыяцыя журналістаў" плануе выдаць зборнік, у якім будуць адлюстраваныя вынікі папярэдняга этапу грамадскага абмеркавання новага законапраекта аб СМІ. У брашуры будуць сабраныя матэрыялы з аналізам найбольш небяспечных палажэнняў законапраекта, заключэнні міжнародных экспертаў (Article19, "Рэпарцёры без межаў", Шведскі Хельсінкскі камітэт і інш.), а таксама заўвагі і прапановы па дэмакратызацыі гэтага дакумента.

"Мы працягнем падрыхтоўку да будучага абмеркавання законапраекта ў парламенце і будзем вельмі рады любым заўвагам і прапановам, якія паступяць на гэты конт", - падкрэсліў кіраўнік Цэнтра прававой дапамогі СМІ пры ГА "Беларуская асацыяцыя журналістаў" Міхаіл Пастухоў.
Минск, Белоруссия