Афіцыйны Менск ігнаруе папярэдні мемарандум ПАРЭ? :: Хартыя'97 :: Навiны

Хаця са дня прадстаўленьня ў Парыжы папярэдняга мэмарандуму “Зьніклыя асобы ў Беларусі” прайшоў тыдзень, беларускія ўлады робяць выгляд, што гэтага дакумэнту не існуе. Прадстаўнікі Парлямэнцкай асамблеі Рады Эўропы мяркуюць, што афіцыйны Менск будзе марудзіць з камэнтарамі да апошняга, то бок да 10 студзеня, калі Хрыстас Пургурыдэс зьбіраецца абнародаваць свае канчатковыя высновы.

Як паведамілі Радыё Свабода ў прэсавых службах Міністэрства ўнутраных справаў і Пракуратуры Беларусі, яны дагэтуль не атрымалі тэксту папярэдняга мэмарандуму “Зьніклыя асобы ў Беларусі”. Нагадаю, што аўтар мэмарандуму Хрыстас Пургурыдэс, у прыватнасьці, прапанаваў ПАРЭ патрабаваць адстаўкі генэральнага пракурора Віктара Шэймана. Прэсавы сакратар апошняга Юры Азаронак заявіў пра стаўленьне свайго шэфа да мэмарандуму:

“Я ня думаю, што такі салідны чалавек як Віктар Уладзімеравіч будзе камэнтаваць заявы Пургурыдэса, які пабыў тры дні ў рэспубліцы, вынес абвінаваўчае заключэньне ды пакаціў. Ня думаю”.

Аднак прэсавы сакратар МЗС Беларусі Андрэй Савіных сказаў, што амбасадар Беларусі ў Францыі Ўладзімер Сянько тэкст мэмарандуму спадара Пургурыдэса атрымаў, але МЗС яго яшчэ не атрымаў.

Супрацоўнікі сакратарыяту ПАРЭ мяркуюць, што сытуацыя складваецца даволі дзіўная, бо Хрыстас Пургурыдэс вельмі апэратыўна напісаў свой папярэдні мэмарандум і прасіў тэрмінова даслаць яго ў Менск. У Страсбургу кажуць, што беларускія ўлады наўмысна не сьпяшаюцца з адказам, бо неўзабаве будуць калядныя сьвяты. Сакратарыят ПАРЭ са зьдзіўленьнем даведаўся, што першы тыдзень студзеня ў Беларусі ніхто працаваць ня будзе, хаця менавіта гэты час спадар Пургурыдэс вызначыў як крайні для адказу афіцыйнага Менску.
Минск, Белоруссия