Журналістцы «БДГ» пагражаюць расправай :: Хартыя'97 :: Навiны

У ноч на 11 студзеня карэспандэнтка “БДГ” па Гомельскай вобласці Ірына Макавецкая атрымала ананімную тэлефонную пагрозу. Напрацягу гадзіны невядомы мужчына тэлефанаваў ёй дахаты некалькі разоў, патрабуючы, каб Ірына перастала займацца журналістыкай і пагражаючы ў адваротным выпадку “пахаваць” яе. Журналістцы ўдалося зрабіць дыктафонны запіс аднаго з тэлефанаванняў. 11 студзеня яна падала заяву ў міліцыю і збіраецца дамагацца высвятлення асобы ананіма.

Як распавяла Ірына Макавецкая прэс-службе ГА “Беларуская асацыяцыя журналістаў”, малады мужчынскі голас назваўся “прадстаўніком беларускага народа”. Ён груба абражаў журналістку, звінавачваючы яе ў “нелюбові да прэзідэнта і беларускага народа”, і запэўніваў, што, нягледзячы на яе намаганні, “трэці прэзідэнцкі тэрмін і рэферэндум будуць”, а “БДГ” засталіся “лічаныя дні”.

Падчас аднаго з тэлефанаванняў невядомы паведаміў, што дзейнічае па даручэнні нейкіх “двух чалавек”. Ён прызнаўся, што яму асабіста “не спадабалася” публікацыя І. Макавецкай у “БДГ”, прысвечаная новаму беларускаму прэм’ер-міністру Сяргею Сідорскаму. (Журналістка рыхтавала гэтую публікацыю на заданне рэдакцыі, і артыкул з’явіўся на старонках газеты на пачатку снежня). Ананім таксама папярэдзіў, што карэспандэнтка “зачапіла чужыя грошы” ў іншай публікацыі, якая тычылася вінаробчага завода “BST”. (Па словах І. Макавецкай, у артыкуле, які выйшаў пры канцы снежня, сапраўды фігуравалі вялікія сумы грошай, а ў якасці аднаго з удзельнікаў канфлікту згадваліся структуры КДБ).

З улікам таго, якія публікацыі згадваў у размове невядомы, а таксама яго добрую інфармаванасць аб падрабязнасьцях судовых разбораў журналісткі са следчым Цераховічам па “справе ўрачоў”, І. Макавецкая не выключае, што ананім з’яўляецца супрацоўнікам нейкіх сілавых структур. “Іншая рэч – што гэта: чыясьці самадзейнасць альбо санкцыянаваная “зверху” акцыя?”, - пытаецца журналістка.
Белоруссия