Журналістам забараняюць распаўсюджваць інфармацыю з судовых працэсаў :: Хартыя'97 :: Навiны

Суддзя Гаспадарчага суда Гродзенскай вобласцi Сяргей Кулакоўскi забаранiў карэспандэнту газеты «День» паведамляць падрабязнасцi судовага працэсу па iску Вольгi Куняўскай да Гродзенскага аблвыканкаму. Гэтая судовая справа 13 студзеня разглядалася ў Гаспадарчым судзе Гродзенскай вобласцi i прыцягнула ўвагу амаль усiх незалежных СМI Гродна, паведамляе pahonia.promedia.by

На пачатку сакавiка 2003 года Вольга Куняўская, жонка выдаўца “Новай газеты Смаргонi” Рамуальда Улана, звярнулася з заявай аб рэгiстрацыi прыватнага ўнiтарнага выдавецкага прадпрыемства “Рэгiён-Прэс”. Аднак Гродзенскi аблвыканкам адмовiў ёй у гэтым нават не патлумачыўшы прычын, па якiх грамадзянка Куняўская не можа заснаваць прадпрыемства. Абараняючы свае правы, Вольга Куняўская звярнулася ў суд. Судовае заседанне пад старшынствам Сяргея Кулакоўскага пачалося сёння ў Гаспадарчым судзе Гродзенскай вобласцi.

Яшчэ да пачатку судовага паседжання суддзя Кулакоўскi заявiў:

- Папярэджваю прысутных тут карэспандэнтаў. Згодна з дзеючым заканадаўствам друкаваць звесткi, атрыманыя ў гэтым судовым працэсе, вы маеце права толькi пасьля атрымання майго дазволу. Калi гэтае патрабаванне закона вы не выканаеце, то вас чакаюць вялiкiя непрыемнасцi.

Пасьля гэтых словаў суддзi карэспандэнты Радыё Свабода i газэты “Бiржа Iнфармацыi” пакiнулi судовае паседжанне.

Пасьля заканчэння судовага паседжання карэспандэнт «Дня» звярнўся да суддзi Кулакоўскага з просьбай атрымаць дазвол на выкарыстанне агучанай на судзе iнфармацыі ў сваёй публiкацыi, прысвечанай судовай справе.

- Я не бачу патрэбы ў падобных публiкацыях... Тут яшчэ нiчога не адбылося... Ды i не трэба эпацiраваць мяне, я заўжды разглядаю справы ў адпаведнасцi з заканадаўствам, i падобны рэзананс i эпатаж на мяне анiяк не ўплывае, - заявiў суддзя.

Не дзiва, што на самым ганаровым месцы кабiнета суддзi Кулакоўскага красуецца Падзяка ад прэзiдэнта Аляксандра Лукашэнкi за “заслугi ў развiццi судовае сiстэмы”.
Белоруссия