Еўрапейская кааліцыя “Свабодная Беларусь” заяўляе аб неабходнасці аб’яднання дэмакратычных сілаў :: Хартыя'97 :: Навiны

15 студзеня адбылося паседжанне каардынацыйнага камітэту Еурапейскай кааліцыі “Свабодная Беларусь”. Сябры камітэту абмеркавалі працу кааліцыі за апошнія два месяцы. Было падкрэслена, што кааліцыя здолела мабілізаваць сваіх актывістаў у падтрымку акцыі “Мы помнім”, якая адбылася 10 снежня, у Міжнародны дзень правоў чалавека. Як і планавалася, напярэдадні Калядаў і Новага года быў распаўсюджаны прыкладна 1 мільён улётак-віншаванняў ад імя Еўрапейскай кааліцыі і БСДП “НГ”. Апошнія сацыялагічныя апытанні сведчаць аб тым, што кааліцыя абрала правільны шлях для сваёй працы, і гэта знаходзіць водгук у беларускім народзе. Запланавана працягваць кампанію дзеля інфармавання насельніцтва Беларусі аб еўрапейскіх каштоўнасцях і працы Еўрапейскай кааліцыі. Сярод адмоўных момантаў было адзначана, што пакуль няма паразумення ўсіх дэмакратычных сілаў Беларусі ў неабходнасці аб’яднання напярэдадні значных палітычных падзеяў у рэспубліцы. З гэтай нагоды каардынацыйны камітэт аднагалосна прыняў зварот да кааліцыі “5+”.

Сябры камітэту выказалі сур’ёзную занепакоенасць лёсам буйнейшых незалежных газет “БДГ” і “Народная воля”, якія апынуліся пад жорсткім прэсам уладаў і знаходзяцца пад пагрозай знішчэння. Каардынацыйны камітэт выказвае салідарнасць з калектывамі гэтых выданняў і патрабуе спыніць пераслед незалежных СМІ і пагрозы на адрас журналістаў.

У паседжанні каардынацыйнага камітэту ўзялі ўдзел прадстаўнікі Гомельскай і Гарадзенскай абласцей.

Зварот Еўрапейскай кааліцыі “Свабодная Беларусь” да Народнай кааліцыі «5+»

Беларусь увайшла ў год парламенцкіх выбараў у надзвычай складанай для дэмакратычных сіл сітуацыі. Практычна ліквідаваны незалежныя СМІ, закрыты грамадскія арганізацыі, якія працавалі з грамадзянскай супольнасцю, пазбаўлены магчымасці нармальнага існавання беларускі ліцэй, узрастае ціск на апазіцыйныя партыі і іх сябраў, у краіне насаджаецца сістэма ідэалагічнага кантролю.

Улады праводзяць мэтанакіраваную кампанію па выключэнню прадстаўнікоў дэмакратычных сіл з выбарчага працэсу, створана і функцыянуе сістэма фальсіфікацыі вынікаў выбараў.

У такіх умовах надзвычай важнай ёсць кансалідацыя ўсіх апазіцыйных сіл і агульная стратэгія ўдзелу ў будучай выбарчай кампаніі.

Зыходзячы з агульных мэтаў – вяртання Беларусі ў рэчышча дэмакратыі –і гатоўнасці іншых дэмакратычных сілаў да сумесных дзеянняў, Еўрапейская кааліцыя “Свабодная Беларусь” прапануе кааліцыі «5+» правесці на працягу студзеня-лютага 2004 г. кансультацыі і перамовы дзеля выпрацоўкі плану агульных дзеянняў.

Мэтай кансультацый ёсць вызначэнне падыходаў да ўдзелу дэмакратычных сіл у выбарах:
· Мэты ўдзелу ў парламенцкіх выбарах
· Плануемыя кампаніі
· Арганізацыя назірання
· Роля партый і непартыйных арганізацый

Мэтай перамоваў ёсць распрацоўка канкрэтных захадаў па аб’яднанню высілкаў, у прыватнасці:
· Дзеля таго, каб пазбегнуць неабгрунтаванай канкурэнцыі дэмакратычных кандыдатаў
· Дзеля выбару найбольш эфектыўнай канцэпцыі агульнанацыянальнай кампаніі
· Дзеля супольнага супрацьдзеяння фальсіфікацыі і кампаніям уладаў супраць дэмакратычных кандыдатаў. Белоруссия