Незалежная газета «День» друкуецца ў Смаленску :: Хартыя'97 :: Навiны

30 студзеня ў продаж павінен паступіць першы ў гэтым годзе нумар недзяржаўнай газеты “День”. Наклад выдання быў надрукаваны 28 студзеня ў Смаленску і дастаўлены ў Беларусь. У рэдакцыі спадзяюцца, што з гэтага часу газета пачне выходзіць штотыдзень.

Першы ў 2004 годзе нумар газеты “День” выйшаў накладам 5 000 асобнікаў на 16 палосах фармату А3. Тэмай нумару стала “газавая блакада”. Чытачы нумару знойдуць таксама вялікі матэрыял, прысвечаны памяці нашага славутага суайчынніка Чэслава Немана, артыкул з расповедам пра тое, як жыхароў Гарадзеншчыны спрабуюць пазбавіць магчымасці глядзець праграму польскага тэлебачання, ды іншыя публікацыі.

Пакуль газета будзе распаўсюджвацца толькі ў Гарадзенскай вобласці і горадзе Менску. Дамову на распаўсюд газеты праз шапікі ўдалося заключыць толькі з Гарадзенскім абласным аддзяленнем “Белсаюздруку”. Пра гэта паведаміў прэс-службе ГА “Беларуская асацыяцыя журналістаў” галоўны рэдактар газеты Мікола Маркевіч.

Па яго словах, 28 студзеня ТАА “Росчерк”, з якім у рэдакцыі была падпісана дамова наконт экспедавання газеты па Беларусі, раптоўна адмовілася ад супрацоўніцтва з выданнем, таму рэдакцыя будзе наладжваць распаўсюд уласнымі сіламі. Па словах Маркевіча, жыхары Менска бліжэйшымі днямі змогуць набыць газету ў прыватных распаўсюднікаў, а таксама знайсці непасрэдна ў рэдакцыі газеты па адрасе вул. Інтэрнацыянальная, 16, пакой 266.

Маркевіч паведаміў таксама, што з наступнага тыдня рэдакцыя плануе наладзіць падпіску на сваё выданне. Белоруссия