Сьвятлана Завадзкая сустракаецца з дэпутатамі Еўрапарлямэнту ў Брусэлі :: Хартыя'97 :: Навiны

Жонка зьніклага журналіста Сьвятлана Завадзкая прыехала ў Брусэль 4 лютага, а учора пачаліся яе сустрэчы з дэпутатамі Еўрапарлямэнту, якія працягнуцца да 6 лютага. Завадзкая павінна сустрэцца з прадстаўнікамі ўсіх фракцыяў, ў тым ліку зь Янам Вірсмам, які ўзначальвае дэлегацыю Еўрапарламенту па Беларусі, Украіне і Малдове. “Я буду прасіць іх, па-першае, падтрымаць мэмарандум Хрыстаса Пургурыдэса, асабліва што да захадаў, каб прымусіць беларускія ўлады завершыць расьсьледаваньні. Па-другое, было бы добра, каб у Еўрапарлямэнце таксама правялі слуханьні праблемы палітычных зьнікненьняў у Беларусі. Такім чынам, паспрабую наладзіць наўпрост кантакты з Еўрапарлямэнтам. Падобныя кантакты з ПАРЭ, з АБСЭ ў нас ужо наладжаныя. А з Еўрапарлямэнтам сустрэча будзе ўпершыню”, -- паведаміла Сьвятлана Завадзкая Радыё Свабода.

Як паведаміла Сьвятлана Завадзкая, яе дадатковым аргумэнтам на карысьць актыўнага ўмяшальніцтва Еўрапарлямэнту ў праблему зьнікненьняў у Беларусі ёсьць адмова КГБ краіны распачаць расьсьледаваньне гэтых справаў. Якраз напярэдадні паездкі ў Брусэль Сьвятлана разам са сваякамі зьніклых хадайнічала аб гэтым у КГБ, але нават не атрымала адказу, хаця належны для гэтага тэрмін ужо мінуў.

Сваякі зьніклых апазыцыянэраў раней заявілі пра свой недавер да сьледчых пракуратуры, якія гэтак і не дапыталі ўсіх падазраваных у арганізацыі зьнікненьняў, у тым ліку генэральнага пракурора Віктара Шэймана ды іншых кіраўнікоў. Белоруссия