Салідарнасьць з віцебскімі галадоўшчыкамі :: Хартыя'97 :: Навiны

Дзясяты дзень у Віцебску праходзіць галадоўка прадпрымальнікаў. Разам з галадоўнікамі каторы дзень запар знаходзіцца сябра Еўрапейскай Кааліцыі “Свабодная Беларусь”, праваабаронца ды журналіст Валеры Шчукін, колькі дзён разам з прадпрымальнікамі галадавалі прадстаўнікі Беларускай сацыял-дэмакратычнай партыі “Народная грамада”.

На знак салідарнасьці зь віцебскімі прадпрымальнікамі сямёра віцебскіх сябраў Аб’яднанай грамадзянскай партыі вырашылі таксама далучыцца да акцыі пратэсту, але супрацоўнікі міліцыі забаранілі ім гэта. Да іх падышоў міліцыянт і сказаў, што ў памяшканьні кірмашу “Мішэль” знаходзяцца рэчы, і ён за іх нясе адказнасьць. А гэтыя людзі яму незнаёмыя, і таму ён просіць іх сысьці.

Пратэстоўцы радуюцца і кожнаму новаму ўдзельніку акцыі, і ўсім, хто гатовы падтрымаць іхны супраціў.

“Каб падтрымаць усё тое, што мы робім, 12 лютага, з 15-й да 18-й гадзіны будуць страйкаваць уладальнікі маршрутных таксовак. Яны сказалі так: “Калі будзе патрэбна, мы гатовыя працягваць гэтую акцыю да поўнае перамогі”. Гэта было так прыемна, калі яны сказалі: “Дзяўчаткі, мы з вамі”, -- паведаміла Радыё Свабода адна з галадоўшчыц.

Бліжэй да вечара крыты кірмаш “Мішэль” пачаў нагадваць баявы штаб: на агульную нараду прыходзілі й прадстаўнікі ўсіх кірмашоў, і ўладальнікі маршрутных таксовак ды прыватных шапікаў. Усе яны зьбіраюцца ўзяць удзел у страйку 12 лютага. Мяркуецца, што ён будзе надзвычай масавы.
Белоруссия