Аксану Новікаву амніставалі :: Хартыя'97 :: Навiны

Камітэт выкананьня пакараньняў амніставаў Аксану Новікаву, якую ў красавіку мінулага году за абразу прэзыдэнта пакаралі двума гадамі пазбаўленьня волі з адтэрміноўкай на два гады. Раней за паклёп на прэзыдэнта былі асуджаныя тры журналісты — Мікола Маркевіч і Павал Мажэйка з газэты “Пагоня” і Віктар Івашкевіч — рэдактар газэты “Рабочы”. Усе яны адбылі пакараньне на так званай “хіміі”.

Цэнтральны суд Менску 4 красавіка мінулага году пакараў Аксану Новікаву за абразу прэзыдэнта. Аксана Новікава 17 кастрычніка 2002 году на Кастрычніцкім пляцы раздавала ўлёткі, у якіх сьцьвярджалася, што Аляксандар Лукашэнка і кіраўнікі сілавых ведамстваў мелі дачыненьне да выкраданьня людзей. Суд пакараў Аксану Новікаву за абразу прэзыдэнта двума гадамі пазбаўленьня волі з адтэрміноўкай на два гады.

Аксана Новікава, нягледзячы на пакараньне, і далей удзельнічала ў вулічных апазыцыйных акцыях. Двойчы яна самастойна правяла пікеты і за гэта панесла адміністрацыйную адказнасьць. За парушэньні Адміністрацыйнага кодэксу Аксану маглі накіраваць адбываць пакараньне ў жаночую калёнію, але чыноўнікі ўлічылі тое, што яна мае маленькае дзіця і ўжылі для маладой маці амністыю.

Паводле закону, Аксана Новікава вызваленая ад адбыцьця пакараньня. Цяпер за ёй лічацца толькі парушэньні Адміністрацыйнага кодэксу. У выпадку затрыманьня на вулічнай акцыі суд будзе разглядаць справу паводле 167 артыкулу як паўторнае парушэньне. За гэта прадугледжаныя пакараньні штрафамі максымальных памераў. Паводле апошніх прысудаў, Аксана мусіць заплаціць 7 мільёнаў 875 тысяч рублёў (гэта каля 3500 даляраў), паведамляе Радыё Свабода.
Минск, Белоруссия