Кнігі Арлова зноў не прайшлі цэнзуру :: Хартыя'97 :: Навiны

Конкурсная камісія выставы-кірмашу “Кнігі Беларусі-2004”, якая пройдзе ў Менску з 17 да 19 лютага, выключыла з намінантаў на званьне найлепшага выданьня году кнігу мастака Зьмітра Герасімовіча й пісьменьніка Ўладзімера Арлова “Краіна Беларусь”. У Міністэрстве інфармацыі сьцьвярджаюць, што гэта зьвязана з тэхнічнымі прычынамі, а менавіта — кніга была надрукаваная па-за межамі Беларусі. Аднак аўтары перакананыя, што насамрэч гэта ёсьць палітычна матываванай замовай найвышэйшых уладаў краіны.

“Кнігі Беларусі-2004” — штогадовая міжнародная выстава-кірмаш, якая сёлета пройдзе адзінаццаты раз. І традыцыйна адмысловая экспэртная камісія вылучае на прэзэнтацыю найлепшую кнігу году паводле зьместу, мастацкіх і тэхнічных вартасьцяў. Паводле папярэдняга адбору, сёлета такой была названая кніга “Краіна Беларусь”. Аднак у выніку галасаваньня яна не ўвайшла нават у тройку найлепшых. Мастак Зьміцер Герасімовіч, які аздабляў “Краіну Беларусь” кажа, што гэта ня першы выпадак забароны на папулярызацыю выданьня й на гэта ёсьць палітычная замова.

“Першыя праблемы ў мяне былі з прэзэнтацыяй кнігі ў Нацыянальнай бібліятэцы, была адмова ў прэзэнтацыі. Затым у Інстытуце праблемаў культуры было адназначна сказана, што такіх праектаў мы не падтрымліваем. Крыху больш мякка, але тое ж і ў Нацыянальным музэі. Я думаю, што па інэрцыі бюракратычны апарат арганізаваўся, і гэтая кніга адназначна была забароненая зьверху. Нашая гісторыя — гэта палітыка”, -- паведаміў Зьміцер Герасімовіч Радыё Свабода.

Пісьменьнік Уладзімер Арлоў перакананы, што галоўнай прычынай забароны на “Краіну Беларусь” сёлета ёсьць ня месца друку выданьня, а зьмест і асоба аўтараў кнігі.

“Нашая ўлада, на жаль, баіцца гісторыі. Невыпадкова мае кнігі, прысьвечаныя гісторыі апошнімі гадамі выходзяць па-беларуску, але за межамі Беларусі. Калі казаць пра “Краіну Беларусь”, то мы са Зьмітром Герасімовічам імкнуліся падкрэсьліць, што ў нас, у беларусаў, эўрапейская гісторыя, а гэта своеасаблівы пропуск у эўрапейскую будучыню. Відаць, некаму вельмі ня хочацца эўрапейскай будучыні для нашай краіны”, -- гаворыць Уладзімер Арлоў.

Адметна, што Аляксандар Лукашэнка ўзнагароджваў пераможцаў школьных алімпіядаў мінулага году менавіта кнігай спадара Арлова “Краіна Беларусь”.
Минск, Белоруссия