Цімафей Дранчук: Я ўдзячны «Зубру» :: Хартыя'97 :: Навiны

Адзін з каардынатараў “Зубра” Цімафей Дранчук заявіў аб прыпыненні сяброўства ў руху. Прычынай стаў уваход у ініцыятыўную групу кандыдата на пасаду прэзідэнта Андрэя Клімава. Рух “Зубр” выконвае мабілізацыйную функцыю і выступае за аб’яднанне апазіцыі. Сябры руху, якія становяцца кандыдатамі ў парламент ці далучаюцца да штаба аднаго з кандыдатаў у прэзідэнты, прыпыняюць сяброўства ў руху. У адпаведнасці з гэтым летам мінулага года прыпыніў сваю працу ў "Зубры" адзін з каардынатараў руху Зміцер Бародка, які прыняў рашэнне балатавацца ў парламент па Барысаўскай выбарчай акрузе. Каардынацыйны Савет “Зубра” выражае свайму сябру падзяку за ўнёсак у станаўленне і развіццё арганізацыі і жадае Цімафею Дранчуку працягваць эфектыўную працу на карысць Беларусі, павемляе прэс-служба руху «Зубр».

Цімафей Дранчук:

“Я вельмі ўдзячны руху “Зубр” за ўсё тое, што атрымаў за гэтыя гады. Той час, які я правеў сярод сваіх сяброў-"зуброў", гэта лепшы час майго станаўлення як асобы. Я ніколі не забуду словы прысягі на вернасць Беларусі і руху “Зубр”, якую я прынес у 2001 годзе ў Курапатах.

Я афіцыйна пакідаю сваю пасаду, але я ніколі не пакіну ў бядзе сваіх сяброў ды паплечнікаў. Я застаюся беларускім патрыётам і ніяк не збіраюся прыпыняць барацьбу, якую мы разам пачалі ў 2001 годзе. Разам мы гэтую барацьбу і давядзем да перамогі.
Разам мы пераможам!”
Минск, Белоруссия