Улады збіраюць звесткі пра распаўсюднікаў газет :: Хартыя'97 :: Навiны

Мясцовыя ўлады ў Брэсцкай і Гродзенскай абласцях пачалі збіраць звесткі пра распаўсюднікаў рэгіянальных газет. Некалькі недзяржаўных выданняў атрымалі з райвыканкамаў запыты "аб прадастаўленні звестак" пра юрыдычныя асобы і прыватных прадпрымальнікаў, якія займаюцца распаўсюдам друкаваных выданняў, іхныя адрасы і рэквізіты дакументаў, якія дазваляюць ажыццяўляць гандаль друкаванай прадукцыяй, паведамляе прэс-служба БАЖ.

У канцы лютага гэткія запыты атрымалі галоўны рэдактар газет "Ляхавіцкі час" і "Intex-press" з Баранавічаў Уладзімір Янукевіч і галоўны рэдактар "Местной газеты" (Ваўкавыск) Андрэй Шантаровіч. Як стала вядома прэс-службе ГА "Беларуская асацыяцыя журналістаў", Ляхавіцкі і Ваўкавыскі райвыканкамы кіраваліся загадамі з аблвыканкамаў, якія прадпісвалі сабраць гэтыя звесткі да 1 сакавіка. У лістах таксама ўтрымлівалася спасылка на прэзідэнцкі ўказ №516 ад 24 верасня 2001 г., паводле якога "на Міністэрства інфармацыі РБ ускладзена дзяржаўнае рэгуляванне ў галіне перадачы і распаўсюду інфармацыі". Намеснік старшыні Ляхавіцкага райвыканкама Мікалай Куліцкі запэўніў, што запыт тычыцца не толькі недзяржаўных, але і дзяржаўных выданняў (у прыватнасці, газеты "Ляхавіцкі веснік").

Сітуацыю каментуе юрыст ГА "Беларуская асацыяцыя журналістаў" Ірына Карамышава:

"Па-першае, у адпаведнасці з артыкулам 13 Канстыруцыі РБ, дзяржава гарантуе свабоднае ажыццяўленне прадпрымальніцкай дзейнасці, якая не супярэчыць закону. Па-другое, паводле арт. 58 Канстытуцыі, ніхто не можа быць змушаны да выканання абавязкаў, не прадугледжаных Законам. Паводле прэзідэнцкага Указа №516 і Палажэння аб Мінінфармацыі, на яго сапраўды ўскладзена функцыя рэгулявання ў галіне перадачы і распаўсюду інфармацыі. Аднак гэтая функцыя не абазначае татальнага кантролю за суб`ектамі гаспадарання, якія распаўсюджваюць перыёдыку. Гэтаксама не ўскладзена такая функцыя і на мясцовыя органы ўлады. Да таго ж, у лістах, якія прыйшлі ў рэдакцыі газет, ніяк не тлумачыцца неабходнасць атрымання такой інфармацыі".
Белоруссия