«За незалежную Беларусь — разам!» :: Хартыя'97 :: Навiны

Такі сьлёган выбраны для сёлятняй кампаніі па сьвяткаваньні Дня Волі. “Мы хочам выкарыстаць 25 сакавіка як дзень яднаньня ўсіх дэмакратычных сілаў, якія спавядаюць ідэалы, закладзеныя Радай Беларускай Народнай Рэспублікі. Вось таму і нарадзіўся гэты сьлёган”, — заявіў сустаршыня Ўсебеларускага нацыянальнага аргкамітэту па сьвяткаваньні 86-х угодкаў БНР Аляксей Марачкін.

6 сакавіка ў сталіцы прайшло паседжаньне рабочай групы аргкамітэту. Быў разгледжаны праэкт звароту да беларускага народу, а таксама абмеркаваная праграма сьвяточных мерапрыемстваў.

У Менску 21 сакавіка ў сядзібе Партыі БНФ адчыніцца выстава твораў Івонкі Сурвіллы і Ілоны Барадулінай. На 23 сакавіка плянуецца канцэрт гістарычнай музыкі “Легенды Вялікага Княства”. 25 сакавіка а 17-й гадзіне распачнецца гуляньне на пляцы Волі ля ратушы. Да помніку Янкі Купалы ўскладуць кветкі, пасьля чаго ў Доме ветэрана адбудзецца сьвяточны канцэрт. Яго праграму складае рэжысёр Валер Мазынскі. У гэты ж дзень пройдзе і вечарына ў Доме літаратара, якую рыхтуе пісьменьніца Вольга Іпатава. 27 сакавіка ў канцэртнай залі “Менск” ладзіцца канцэрт “Я нарадзіўся тут”.

14 сакавіка аб 11-й гадзіне ў офісе БНФ адбудзецца паседжаньне аргкамітэту, дзе плянуецца прыняць зварот да беларускага народу, а таксама абмеркаваць ход падрыхтоўкі да сьвята незалежнасьці, паведамляе прэс-служба БНФ. Белоруссия