Мікола Маркевіч — цалкам вольны :: Хартыя'97 :: Навiны

Скончыўся тэрмін пакараньня галоўнага рэдактара зачыненай гарадзенскай незалежнай газэты “Пагоня” Міколы Маркевіча. Улетку 2002 году за публікацыю ў газэце ён атрымаў прысуд — паўтара году абмежаваньня свабоды “за паклёп на прэзыдэнта”. Разам зь Міколам Маркевічам судзілі журналіста Паўла Мажэйку, тэрмін абмежаваньня свабоды якога быў на паўгоду меншы.

Пратэст супраць суду над супрацоўнікамі “Пагоні” выказалі журналісты, грамадзкасьць, у тым ліку міжнародная. Маральную падтрымку аказалі замежныя дыпляматы, якія прысутнічалі на судзе, а потым наведвалі журналістаў у папраўчых установах. Міколу Маркевіча ўзнагародзілі прэстыжнай прэміяй нямецкага часопіса “Zeit” “За прафэсійнасьць і мужнасьць”.

Апошні год Мікола Маркевіч знаходзіўся на гэтак званых папраўчых работах па месцы жыхарства, у яго ўтрымлівалі 15% заробку на карысьць дзяржавы. А першыя паўгоду ён адбываў пакараньне ў Асіповічах — у папраўчай установе адкрытага тыпу.

“Гэты дзень для мяне многае значыць. Хаця, я хачу падкрэсьліць, што выраз “на свабоду з чыстым сумленьнем” — гэта не пра мяне, бо я і ў няволю пайшоў з чыстым сумленьнем. Гэтая падзея дазволіць мне, бо я так сам сабе заплянаваў, зьвярнуцца ў суд з касацыйнымі скаргамі на на гэты несправядлівы і незаконны вырак суду Ленінскага раёну Горадні”, -- паведаміў Маркевіч Радыё Свабода.
Белоруссия