Лукашэнка тайна катаецца на лыжах у Славеніі :: Хартыя'97 :: Навiны

15 сакавіка, Дзень Канстытуцыі Беларусі, Аляксандар Лукашэнка правёў у Славеніі, пра што паведаміла люблянская тэлекампанія POP TV. Спадара Лукашэнку запрасіў туды з прыватным візытам славенскі бізнэсовец. Славенцы пацьвярджаюць, што бачылі Аляксандра Лукашэнку на гарналыжным курорце. Але прэсавая сакратарка Лукашэнкі абвяргала гэта, пакуль учора у эфір ня выйшаў матэрыял Радыё Свабода з падрабязнасьцямі ягонага знаходжаньня ў Славеніі. Праз гадзіну пасьля гэтага прэсавая служба Аляксандра Лукашэнкі паведаміла, што ў аўторак скончыўся ягоны кароткатэрміновы візыт у Славенію, дзе "состоялся ряд рабочих встреч Главы белорусского государства с видными политическими деятелями и представителями крупного бизнеса".

Прадстаўнік МЗС гэтай краіны Рок Саркр пацьвердзіў, што Аляксандар Лукашэнка знаходзілся ў Славеніі, але заявіў:

-- Наконт візыту Лукашэнкі ад імя міністэрства я магу толькі пацьвердзіць, што гэта — прыватны візыт. Што да астатняга — ня ведаю, мо лепш зьвязацца зь беларускім бокам.

Потым я патэлефанаваў Натальлі Пяткевіч, прэсавай сакратарцы Аляксандра Лукашэнкі, і спытаўся, што робіць ён у Славеніі:

-- Не, прэзыдэнт на месцы. Я ўсё сказала.

Аднак Аляксандар Лукашэнка меў размову з былым славенскім прэзыдэнтам Міланам Кучанам — як паведаміла мне дарадца апошняга Шпэла Фурлан, беларускі кіраўнік пажадаў абмеркаваць будучыню Эўразьвязу пасьля пашырэньня. Нагадаю, што Славенія ёсьць адной зь дзесяці краінаў, якія стануць сябрамі Эўрапейскага Зьвязу 1 траўня. Паводле спадарыні Фурлан, сустрэча двух палітыкаў адбылася раніцай 15 сакавіка:

Карэспандэнт:

-- Дзе прайшла гэтая сустрэча?

Фурлан:

-- У ваколіцах гораду Кран — месца называецца Брдо. Ведаеце, гэта як камэрцыйная, гэтак і ўрадавая ўстанова. Але ўрадавая тады, калі ўраду патрэбная гэтая ўстанова.

Спадарыня Фурлан пацьвердзіла, што гэта яе шэф — экс-прэзыдэнт Кучан прыехаў у замак Брдо да спадара Лукашэнкі, а не Лукашэнка да Кучана. На пытаньне, хто плаціў за гэтую рэзыдэнцыю, Шпэла Фурлан адказала:

-- Мяркую, што сам спадар Лукашэнка.

На сайце brdo.com можна даведацца, што гэты гатэльны комплекс службы дзяржаўнага пратаколу Славеніі адкрыты для кожнага, хаця бальшыня гасьцей — бізнэсоўцы. Я пацікавіўся ў дзяжурнай, колькі каштуе прэзыдэнцкі нумар у замку Брдо і ці можна там пасяліцца зараз.

-- У замку гэта каштуе 858 эўра за ноч. Але ў замку зараз гэта немажліва.

Маркетынгавая мэнэджарка комплексу Брдо сказала мне, што знаходжаньне Аляксандра Лукашэнкі ў замку ёсьць вялікім сакрэтам і яе могуць звольніць, калі яна нешта скажа.

На маё пытаньне, колькі дзён правёў Аляксандар Лукашэнка ў гэтым нумары, кіраўнік комплексу Брдо Ўладо Сэкірнік даў такі адказ:

-- Я тут мэнэджэр. Я не КГБ.

Але спадара Лукашэнку ў замку Брдо бачылі крыніцы люблянскіх журналістаў, сказала мне прадстаўніца тэлекампаніі POP TV:

-- Мы не змаглі зьняць яго на камэру ў тым замку, дзе ён цяпер знаходзіцца, бо тады ён катаўся на лыжах у Крваўцы.

Крвавец — гэта гарналыжны курорт Славеніі на вышыні паўтары-дзве тысячы мэтраў над узроўнем мора, які працуе кожную зіму як мінімум да 15 красавіка. Славенскія мэдыі паведамілі, што Аляксандра Лукашэнку запрасіў Янэз Шкрабец — дырэктар фірмы Riko, якая знаходзіцца ў Любляне, выпускае зборныя дамы й вядзе актыўную дзейнасьць на рынку былога СССР. Зьвязацца са спадаром Шкрабецам не атрымалася, бо ён у аўторак вылецеў зь Любляны ў Маскву, дзе будзе знаходзіцца да красавіка.

Тэлекампанія POP TV зазначыла, што ў лістападзе 2002 году Чэхія ня выдала спадару Лукашэнку візы для паездкі на саміт НАТО ў Прагу, таму міністэрства замежных справаў Славеніі зьвярнулася ў Брусэль па кансультацыі. Але ў штаб-кватэры Эўразьвязу ня мелі пярэчаньняў, бо забароны для Аляксандра Лукашэнкі на ўезд у краіны-сябры гэтай арганізацыі няма.

Варта нагадаць, што месяц таму спадару Лукашэнку далі аўстрыйскую візу, і МЗС Аўстрыі паведаміла, што ён паедзе катацца на лыжах у тырольскія горы.
Белоруссия