Рэчыцкiя ўлады забаранілі апазыцыйную акцыю :: Хартыя'97 :: Навiны

На мінулы суботнi дзень у Новарэчыцкiм мiкрараёне плянаваўся мiтынг "За паляпшэньне ўмоваў жыцьця й дабрабыт". На мiтынгу мелi выступiць лiдэры партыяў Народнай каалiцыi "Пяць плюс". У горадзе зьявiлася некалькi тысячаў улётак зь iнфармацыяй пра пададзеную заяўку й пра "5+". Аднак гарадзкiя ўлады без важкiх юрыдычных падставаў адмовiлi заяўнiку, старшынi Рэчыцкай арганiзацыi Партыi БНФ Валеру Пуцiцкаму ў правядзеньнi акцыi. Кiраўнiцтва ўстановы, дзе Пуцiцкi працуе iнжынерам, накiравала яго на цэлы дзень на буравую, каб ня мог зьявiцца на месцы меркаванага мiтынгу, паведамляе прэс-служба БНФ.

Арганiзатары вырашылi памяняць фармат акцыi. Гараджанам, якiя прыйшлi на заяўленае месца мiтынгу, было прапанавана ўвечары прыйсьцi ў памяшканьне каапэратыву "Дняпро" на сустрэчу з дэлегацыяй "5+". Зь Менску на сустрэчу прыехалi старшыня Партыi БНФ Вiнцук Вячорка, намесьнiк старшынi БСДГ Анатоль Астапенка, другi сакратар ЦК ПКБ Аляксандар Пахлопка й прадстаўнiца АГП Валянцiна Палевiкова; з Гомеля -- старшыня Беларускай партыi "Зялёныя" Алег Грамыка.

Аднак як толькi Валер Пуцiцкi адкрыў спатканьне, у залю ўвайшла група людзей ва ўнiформе ў суправаджэньнi вiдэаапэратара. Групу ўзначальвалi намесьнiк начальнiка Рэчыцкага РУУС падпалкоўнiк Рыжкоў i начальнiк Рэчыцкага раённага аддзелу надзвычайных сытуацыяў падпалкоўнiк Барысенка. Падпалкоўнiкi запатрабавалi ад прысутных дзеля iхнай жа уласнай бясьпекi неадкладна пакiнуць памяшканьне, бо будынак у аварыйным стане, i спаслалiся на "Дырэктыву № 1". Вiнцук Вячорка запатрабаваў паказаць дакумэнт аб аварыйным стане будынку, якога, натуральна, на руках у пажарнiкаў не было. Тады мiлiцэйскi начальнiк прыгразiў вывесьцi людзей з будынку ґвалтам.

Каб не дапусьцiць зрыву сустрэчы, удзельнiкi вырашылi правесьцi яе на прыватнай кватэры й пакiнулi будынак. На вулiцы яны пабачылi мiлiцэйскiя машыны й намесьнiка старшынi выканкаму сп. Атаманчука, якi асабiста прыехаў прасачыць выкананьне загаду сарваць сустрэчу "5+". Рэчыцкая мiлiцыя й людзi ў цывiльным адсочвалi перамяшчэньнi менскiх гасьцей па горадзе да канца. Белоруссия