Вiнцук Вячорка й Партыя БНФ падаюць у суд на Беларускае тэлебачанне :: Хартыя'97 :: Навiны

Напярэдаднi гадавiны Чарнобыльскай трагедыi прапагандысцкая машына Лукашэнкi не пагрэбавала палiтычнай спэкуляцыяй на беларускай бядзе й прамой хлусьнёй. Як паведамляе прэс-служба Партыі БНФ, нехта Пракопаў у сюжэце “Шлях у нiкуды” вечаровай праграмы “У цэнтры ўвагi” заявiў, нiбыта “старшыня Партыi БНФ Вiнцук Вячорка паабяцаў у выпадку прыйсьця БНФ да ўлады спынiць падтрымку чарнобыльскiх рэгiёнаў”.

Вiнцук Вячорка камэнтуе гэтую абуральную падзею:

“Кожны, хто ведае гiсторыю чарнобыльскага пытаньня, ведае таксама, што зрабiў Народны Фронт для зьмяншэньня наступстваў бяды, а што пасьля нарабiў Лукашэнка з памагатымi. Менавiта БНФ прымусiў улады прызнаць, што адбылася катастрофа, i ўрэшце прыняць г.зв. канцэпцыю беларускiх вучоных - спынiць выраб харчовай прадукцыi ў забруджаных рэгiёнах, а з найбольш заражаных перасялiць людзей. Гэтыя захады прадыктаваныя клопатам пра здароўе й жыцьцё цяперашнiх i будучых пакаленьняў беларусаў, дзе б яны нi жылi. Калi ж да ўлады дарваўся дачасьнiк, якому напляваць, што будзе пасьля яго, было вырашана, што таньней i спакайней будзе i харч там вырабляць, i людзей вымусiць застацца. А паколькi эканомiка iмклiва руйнавалася, то й iльготы ў чарнобыльцаў i лiквiдатараў паадбiралi. Мы, Партыя БНФ, патрабуем вярнуць iм iльготы й зноў зьвярнуцца да прынятай Вярхоўным Саветам 12 склiканьня канцэпцыi, якая зьберажэ людзкое здароўе.

Хлусы кшталту Пракопава, хоць яны толькi халуйскiя вiнцiкi ў мэханiзьме прапаганды, павiнны адказаць за паклёп, за перакладваньне з хворай галавы на здаровую. I я асабiста, i Партыя БНФ падаюць на Пракопава й на “Першы нацыянальны канал” у суд”, -- заявiў Вiнцук Вячорка. Белоруссия