Арыштаваны актывіст прадпрымальніцкага руху :: Хартыя'97 :: Навiны

27 красавіка ў Горадні пакаралі арыштам Зьмітра Іваноўскага — намесьніка старшыні грамадзкага аб’яданьня прадпрымальнікаў “Пэрспэктыва”. Суд палічыў яго актыўным удзельнікам вулічнага сходу прадпрымальнікаў 26 красавіка і прысудзіў 15 сутак арышту.

У будынак Ленінскага суду не пускалі нікога, хто прыйшоў на суд над Зьмітром Іваноўскім. А сабраліся каля трыццаці прадпрымальнікаў. Пяцёра міліцыянтаў ахоўвалі дзьверы, а насупраць увесь час дзяжурыла машына з амонаўцамі.

Міліцыянты таксама папярэдзілі, што тым больш забаронена пускаць журналістаў.

Увогуле разам з Іваноўскім дазволілі зайсьці толькі чатыром сьведкам зь ягонага боку. Сярод іх быў і намесьнік галоўнага рэдактара газэты “День” Андрэй Пачобут. Яму адразу сказалі пакінуць на вуліцы ня толькі дыктафон і фотаапарат, але і ўсе рэчы. Але гэта было яшчэ ня ўсё.

“На ўваходзе намесьнік начальнік Ленінскага РАУС капітан Хілько загадаў, каб мне зрабілі асабісты догляд. Ён патлумачыў гэта загадам судзьдзі. Мне вывернулі кішэні. На судзе, пасьля таго, як я даў паказаньні як сьведка, я спытаў у судзьдзі Натальлі Козел — ці давала яна загад мяне абшукваць? Яна вельмі зьдзівілася. Ну, а прысутны міліцыянт патлумачыў, што мой асабісты догляд — гэта патрабаваньні бясьпекі суду. Пратакол асабістага догляду складзены ня быў”, -- паведаміў Пачобут Радыё Свабода.

Нагадаем, дзесяцьцю суткамі арышту Іваноўскага пакаралі напачатку сакавіка за арганізацыю “мітынгу маўчаньня” прадпрымальнікаў. Усе 10 сутак ён галадаў за кратамі.
Минск, Белоруссия