Беларусы правялі пікет ля Рады Эўропы :: Хартыя'97 :: Навiны

28 красавіка Беларуска-Эўрапейскае Задзіночаньне (БЭЗ) правяло пікет у Страсбуры з мэтай прыцягненьня ўвагі да сітуацыі са зьнікненьнямі апазыцыйных палітыкаў Беларусі. Пад час пікета каля галоўнага ўваходу ў будынак Рады Эўропы парламентарам было раздадзена каля 500 асобнікаў кнігі "Хочам ведаць праўду" на ангельскай мове. Як вядома, кніга зьмяшчае матэрыялы, прысьвечаныя зьніклым беларускім палітыкам Ю. Захаранку, В. Ганчару, А. Красоўскаму ды журналісту З. Завадзскаму. Амаль кожны дэпутат ПАРЭ атрымаў свой уласны асобнік гэтай кнігі. На агароджы Рады Эўропы пікетоўцы замацавалі плакаты з надпісамі "Стоп палітычным зьнікненьям!", "Расея спыні падтрымку Лукашэнкі!", "Спыніць кантакты з нелігітымнымі ворганамі ўлады Беларусі!".

Акцыя прыцягнула вялікую ўвагу журналістаў Эўропы. Прысутнічалі здымачныя групы Euronews і некалькіх нямецкіх тэлеканалаў.

У пікеце прынялі ўдзел каля 20 чалавек - палітычныя ўцекачы, сваякі зьніклых, дэпутаты Рады Эўропы. Арганізатары сэсіі ПАРЭ запрасілі пікетоўцаў на паседжаньне, калі адбывалася абмеркаваньне й прыняцьце рэзалюцыяў па Беларусі.

Акцыя паўплывала (па словах саміх парламентароў) на прыняцьце строгага рашэньня па сітуацыі са зьнікненьнямі палітыкаў і уціску беларускай прэсы.

Белоруссия