Беларусы замежжа падтрымалі акцыю «Мы памятаем» :: Хартыя'97 :: Навiны

Зьвяз Беларусаў замежжа (Чэхія), Беларуска -Эўрапейскае задзіночаньне (Бэльгія), Зьвяз у падтрымку дэмакратыі на Беларусі (Польша) і жонка віцэ-спікера Вярхоўнага Савету 13 скліканьня Генадзя Карпенкі, які загінуў пры невядомых абставінах у 1999 годзе, Людміла Карпенка, якая атрымала палітычны прытулак у Нямеччыне, падтрымалі акцыю “Мы памятаем”. Акцыя павінна адбыцца ў Менску 7 мая, у гадавіну зьнікненьня былога міністра ўнутраных справаў Юры Захаранкі і будзе прысьвячацца праблеме палітычных зьнікненьняў у Беларусі. Пачатак мерапрыемства ў 17:30 на Кастрычніцкай плошчы. Прапануем вашай увазе ліст у падтрымку акцыі “Мы памятаем”. Нагадаем, што гэтую акцыю падтрымала таксама Еўрапейская Кааліцыя “Свабодная Беларусь”.

Ліст у падтрымку акцыі “Мы памятаем”, якая адбудзецца на Беларусі 7 траўня 2004 года

Ад 1994 года, калі на пасаду прэзыдэнта Беларусі быў абраны Аляксандар Лукашэнка, у гісторыі краіны пачалася чорная паласа. Усе тыя пачынаньні, якія адбываліся на Беларусі пасьля развалу Савецкага Зьвязу - дэмакратызацыя, адраджэньне нацыянальнай культуры, гістарычнай памяці, эурапэйскіх традыцыяў - былі спыненыя, і краіна волей аднаго чалавека была разьвернутая ў адваротным накірунку.

У 1995 годзе ў будове Вярхоўнага Савета на загад Лукашэнкі былі брутальна зьбітыя апазыцыйныя дэпутаты парлямэнту 12-га скліканьня.

У 1996 годзе быў абраны новы Вярхоўны Савет, які праіснаваў паўгады і быў разагнаны загадам Лукашэнкі. Шмат хто з дэпутатаў 13-га скліканьня, што спрабавалі супярэчыць рэжыму, былі жорстка пакараныя. Дэпутаты В. Кудзінаў і А. Клімаў па надуманых крымінальных справах былі пасаджаны ў турму. Старшыня самай уплывовай апазыцыйнай партыі - БНФ - Зянон Пазьняк і яго намесьнік Сяргей Навумчык былі вымушаныя пакінуць Радзіму і стаць першымі палітычнымі ўцекачамі ў навейшай гісторыі Беларусі.
6 красавіка 1999 года пры загадкавых абставінах памёр адзін з лідэраў нацыі віцэ-спікэр Вярхоўнага Савета 13-га скліканьня Геннадзь Карпенка.

7 траўня 1999 года зьнік па дарозе да дому былы міністр унутраных справаў гэнерал Юры Захаранка.

16 верасьня 1999 года невядомымі былі зьбітыя і выкрадзеныя віцэ-спікэр ВС Віктар Ганчар і бізнэсовец Анатоль Красоўскі.

7 ліпеня 2000 года папоўніў сьпіс зьніклых людзёў беларускі рэпарцёр расейскага тэлебачаньня Дзьмітры Завадзкі.

На пачатку свайго прэзыдэнцтва Лукашэнка заяўляў, што ён адказны за ўсё, што адбываецца ў краіне. Прайшло даволі шмат часу, але дагэтуль ніхто і ніяк не адказаў за вышэйузгаданыя факты.

Таму мы, ніжэйпадпісаўшыеся, падкрэсліваем сваё нэгатыўнае стаўленьне да антынароднага рэжыму Лукашэнкі, выказваем салідарнасьць усім сілам, якія супрацьстаяць дыктатуры на Беларусі і падтрымліваюць пацярпелых ад рэпрэсій.

Будзем разам, і Беларусь стане вольнай!

Зьвяз Беларусаў замежжа (Чэхія)
Беларуска -Эўрапейскае задзіночаньне (Бэльгія)
Зьвяз у падтрымку дэмакратыі на Беларусі (Польша)
Людміла Карпенка (Нямеччына)