Алесь Міхалевіч выйшаў на волю :: Хартыя'97 :: Навiны

Сёньня а 9 гадзіне раніцы, пасьля 10 сутак зьняволеньня быў адпушчаны Алесь Міхалевіч, намесьнік старшыні Партыі БНФ, заяўнік “Чарнобыльскага Шляху -2004”. 27 красавіка яму прысудзілі 10 сутак арышту за парушэньне парадку й арганізацыі правядзеньня масавых мерапрыемстваў падчас “Чарнобыльскага шляху-2004”. Каля сьценаў спэцпрыёмніка-разьмеркавальніка на вул. Акрэсьціна, дзе адбываў пакараньне палітвязень, сабраліся яго сябры і паплечнікі.

Сярод прысутных былі намесьнік старшыні АГП Сяргей Альфер, старшыня Асамблеі НДА Сяргей Мацкевіч, сябра палітсавету АГП Людміла Гразнова, старшыня Партыі БНФ Вінцук Вячорка. Прысутныя сустрэлі Алеся Міхалевіча апляскамі і воклічамі “Жыве Беларусь!”.

Па словах Міхалевіча адміністрацыя спэцпрыёмніку ставілася да яго даволі добра. У камэры было ўсяго чатыры чалавека.“Усе зьняволеныя вельмі ўдзячныя “палітычным”, бо зь іх зьяўленьнем на Акрэсьціна сталі карміць два разы, нават пачалі даваць катлеты,” – кажа Міхалевіч.

У няволі палітвязьня наведаў прадстаўнік Чэскай Рэспублікі Уладзімір Румл. Сустрэча з амбасадарам адбылася у кабінеце начальніка спэцпрыёмніка, які таксама прысутнічаў падчас размовы. “Спадар Румл выказаў мне сваю падтрымку. Ён ніяк не мог зразумець, чаму я тут апынуўся, і ў чым была мая віна,” – кажа Міхалевіч.
Минск, Белоруссия