На помніку Ўладзімеру Караткевічу ў Віцебску намалявалі свастыку :: Хартыя'97 :: Навiны

Чыноўнікі з гарвыканкаму лічаць, што гэта звычайнае хуліганства несьвядомых падлеткаў. Прадстаўнікі літаратурнага ды мастацкага асяродку не выключаюць, што гэты ўчынак мае палітычны характар ды зьвязаны зь дзейнасьцю ў Віцебску фашыстоўскай арганізацыі РНЕ.

Сёньня ніхто ня можа сказаць дакладна, калі на помніку Ўладзімеру Караткевічу, што стаіць у сквэры каля плошчы Леніна, зьявілася выява свастыкі ды яшчэ колькі нецэнзурных словаў, напісаных сіняй фарбай. Першыя тэлефонныя званкі са скаргамі грамадзянаў прагучалі ў Кастрычніцкім райаддзеле міліцыі сёньня зранку. Разам зь міліцыянтамі на месцы здарэньня зьявіўся і супрацоўнік аддзелу культуры гарвыканкаму Яўген Клемянцёнак, які напачатку нават адмаўляўся камэнтаваць гэты факт, як, на ягоную думку, надта дробязны ды нязначны.

Больш насьцярожана да гэтага факту паставіліся віцебскія літаратары ды сябры Таварыства беларускай мовы, у тым ліку супрацоўніца Віцебскай абласной управы аховы помнікаў Ніна Сулецкая:

“Ведаеце, калі там намалявалі свастыку, гэта ўжо іншае — гэта ўжо ня толькі абраза помніка, але й прапаганда фашыстоўскіх сымбаляў, фашыстоўскае ідэалёгіі. І гэта ўжо артыкул Крымінальнага кодэксу!”.

Спадарыня Сулецкая згадала выпадак, калі за бойку са студэнтамі-замежнікамі асудзілі чатырох віцяблянаў, адзін зь якіх прызнаў сябе сябром мясцовай арганізацыі РНЕ. Ці мае дачыненьне РНЕ да апошняга здарэньня з помнікам Караткевічу, будуць высьвятляць сьледчыя. Але хіба ў тым выпадку, калі паводле гэтага факту будзе заведзеная крымінальная або адміністрацыйная справа. Пра гэта будзе вядома толькі заўтра.

Дарэчы, падобная крымінальная справа, заведзеная паводле факту пашкоджаньня помніка Ўладзімеру Караткевічу ў Воршы, так і ня скончылася станоўчым вынікам: злодзеяў, якія скралі шыльду зь вершаванымі радкамі пісьменьніка, дагэтуль не знайшлі.