Каго абараняюць? :: Хартыя'97 :: Навiны

75 дэпутатаў «палаты прадстаўнiкоў нацыянальнага сходу» Беларусi дружна паставiлi свае подпiсы пад зваротам-патрабаваннем аб вызваленнi экс-прэзiдэнта Югаславii Слабадана Мiлошавiча. Iнiцыятарам дакумента стаў намеснiк старшынi пастаяннай парламенцкай камiсii па мiжнародных справах i сувязях з СНД Сяргей Касцян. У iнтэрв`ю БелаПАН ён нагадаў, што 14 мая аналагiчны зварот было прапанавана прыняць усёй «палаце прадстаўнiкоў», аднак для прыняцця станоўчага рашэння не хапiла ўсяго аднаго дэпутацкага голаса. Як бачым, многiх нашых дэпутатаў моцна хвалюе лёс былога прэзiдэнта Югаславii Мiлошавiча, якi, па меркаваннi еўрапейскiх праваахоўных органаў, павiнен несцi судовую адказнасць за свае ўчынкi.

Чаму ж беларускiх "дэпутатаў" не хвалюе лёс сваiх калег, якiя ўжо шмат дзён працягваюць галадоўку? Яны пайшлi на мужны крок, каб палепшыць выбарчае заканадаўства i правесцi чэсныя, справядлiвыя выбары, вярнуць краiне павагу ў свеце. Мэты - высакародныя! Iх падтрымлiваюць партыi i рухi, мiльёны беларусаў. За ходам галадоўкi сочыць Еўропа. А дзе ж беларускiя дэпутаты? Iх моцнага голасу чамусьцi не чуваць.

Скажаце: пытанне, iнiцыяванае генералам Фраловым i яго сябрамi, унесена ў павестку дня сесii на 22 чэрвеня. А чаму так позна? Што, той жа спiкер Папоў цi яго намеснiк Канаплёў не ведаюць, што да 22 чэрвеня галадоўшчыкi могуць не дажыць? А чаму не ратуюць сваiх калег iншыя «дэпутаты»? Чаму маўчыць генерал Чаргiнец? Цi ён ужо не генерал? Чаму маўчаць тыя ж Хрол, Ананьеў, Касцян, iншыя?

Не правяла грунтоўныя парламенцкiя слуханнi так званая «палатка» i па ходу расследавання аб знiклых палiтычных апанентах рэжыму. Дзе Ганчар? Дзе Захаранка? Дзе Завадскi? Дзе Красоўскi?.. Гэта i многае iншае цiкавiць Еўропу i ўвесь цывiлiзаваны свет. А дзе ж голас беларускiх «дэпутатаў»? Не выступаюць яны i ў абарону Марынiча... Iх, бачыце, хвалюе лёс дыктатара Мiлошавiча, якi развязаў канфлiкт на Балканах, у ходзе якога пралiта шмат крывi.

Хто ж у свеце будзе паважаць i прызнаваць такi «парламент»?
Минск, Белоруссия