Рада беларускай інтэлігенцыі падтрымала акцыю 21 ліпеня :: Хартыя'97 :: Навiны

Рада беларускай інтэлігенцыі падтрымлівае прапанову па правядзенні 21 ліпеня ў Мінску акцыі па абмеркаванні вынікаў дзейнасці Аляксандра Лукашэнкі на пасадзе прэзідэнта. “21 ліпеня 2004 года сканчваецца дзесяцігадовы тэрмін знаходжання Аляксандра Лукашэнкі на пасадзе Прэзідэнта Рэспублікі Беларусь. Згодна дзеючай Канстытуцыі, гэта – максімальны тэрмін, напрацягу якога адна асоба можа знаходзіцца на пасадзе прэзідэнта нашай краіны”, -- гаворыцца ў звароце Рады беларускай інтэлігенцыі. Грамадзянская ініцыятыва заклікае кожнага, хто адчувае сябе грамадзянінам Беларусі, прыйсці на гэтую акцыю.

Зварот

21 ліпеня 2004 года сканчваецца дзесяцігадовы тэрмін знаходжання Аляксандра Лукашэнкі на пасадзе Прэзідэнта Рэспублікі Беларусь. Згодна дзеючай Канстытуцыі, гэта – максімальны тэрмін, напрацягу якога адна асоба можа знаходзіцца на пасадзе Прэзідэнта нашай краіны.

Тымчасам ні А. Лукашэнка, які па сваёй пасадзе павінен выконываць функцыі гаранта Канстытуцыі, ні іншыя асобы і структуры, у чыі абавязкі ўваходзіць забеспячэнне законнасці ў Рэспубліцы Беларусь, ніякім чынам не выказываюць свайго стаўлення да гэтай сітуацыі. Наадварот, у дзеяннях і выказваннях названых асобаў яўна праглядаецца імкненне праігнараваць гэтую праблему. Гэткая тэндэнцыя дзеячай улады прытрымлівацца не існуючых законаў, а ўласных жаданняў і патрэбаў, у выніку і прывяла да названага юрыдычнага тупіку.

У сувязі з гэтым грамадзянская ініцыятыва “Рада беларускай інтэлігенцыі” лічыць недапушчальным замоўчване факта парушэння Канстытуцыі ў выпадку, калі А. Лукашэнка будзе заставацца на пасадзе Прэзідэнта Рэспублікі Беларусь пасля сканчэння дзесяцігадовага тэрміну і падтрымлівае прапанову па правядзенні 21 ліпеня 2004г. ў Мінску мітынгу па абмеркаванні вынікаў ягонай дзейнасці на пасадзе Прэзідэнта, а таксама сітуацыі, якая складзецца ў выпадку, калі ён не пакіне сваю пасаду пасля сканчэння легітымнага тэрміну.

Лічым, што Аляксандру Лукашэнка таксама належыць прысутнічаць на мітынгу, каб пачуць голас народа. Спадзяемся, што на гэтым мітынгу ён здзейсніць учынак, які пацвердзіць ягоную вартасць як гаранта Канстытуцыі.

Заклікаем кожнага, хто адчувае сябе грамадзянінам Беларусі, прыйсці на гэты мітынг.

Ад імя грамадзянскай ініцыятывы Рада беларускай інтэлігенцыі

Уладзімір Колас,
старшыня

12 ліпеня 2004г.
Минск, Белоруссия