1000 даляраў штрафу за падтрымку галадоўкі :: Хартыя'97 :: Навiны

13 ліпеня старшыня гарадзкой арганізацыі свабоднага прафсаюзу прадпрымальнікаў Тацяна Марчанка атрымала ў Цэнтральным судзе Гомеля пастанову судзьдзі Яраслава Парэмскага пра адміністрацыйнае пакараньне – штраф у 1 мільён 900 тысячаў рублёў. Пакараньне вынесена нібыта за несанкцыянаваны сход падчас чэрвеньскага страйку ў падтрымку дэпутатаў-галадоўнікаў. У той жа дзень судзьдзя Парэмскі абвясьціў рашэньне ў дачыненьні прадпрымальніка Ўладзімера Няпомняшчых. Як і Тацяна Марчанка, спадар Няпомняшчых аштрафаваны на 1 мільён 900 тысячаў рублёў. Ён таксама прызнаны вінаватым у правядзеньні несанкцыянаванага сходу на Цэнтральным рынку падчас чэрвеньскага страйку ў падтрымку дэпутатаў-галадоўнікаў.

“Адзін мільён 900 тысячаў рублёў – я ад такога штрафу ў шоку. У нас няма такіх заробкаў, каб столькі сплаціць. Гэта вар`яцкі штраф для Беларусі. Ніякія доказы з нашага боку ва ўвагу не былі прынятыя. Мяне мэтанакіравана хацелі аштрафаваць і аштрафавалі. Яшчэ нібыта і паблажку зрабілі. Маўляў, паколькі я не прычыніла істотнага ўрону правам і інтарэсам грамадзянаў, то арыштоўваць мяне не абавязкова, а аштрафаваць можна”, -- паведаміла прадпрымальніца Радыё Свабода.

Тацяну Марчанку і Ўладзімера Няпомняшчых міліцыя абвінаваціла не ў арганізацыі страйку, а ў правядзеньні на рынку 17 чэрвеня несанкцыянаванага сходу.

За судовымі справамі ў дачыненьні прадпрымальнікаў назіраў гомельскі прадстаўнік Беларускага Хэльсынскага камітэту Алесь Яўсеенка:

“Быў праведзены страйк, які хочацца нашым уладам кваліфікаваць як несанкцыянаваны сход. Супрацоўнікі міліцыі, якія затрымлівалі прадпрымальнікаў, не маглі сфармуляваць паняцьці “страйк” і “сход”. Называлі сход “скоплением людей”. Пад “скопление” можна падвесьці людзей, якія чакаюць на прыпынку тралейбуса. Можна ўсіх іх загрэбсьці і абвінаваціць у несанкцыянаваным сходзе. Ціск гэты зьвязаны з недалёкімі парлямэнцкімі выбарамі, які будуць праходзіць у кастрычніку. Усялякую апазыцыю, іншадумства спыняюць загадзя, не чакаючы выбараў”.
Минск, Белоруссия