Новыя крымінальныя справы супраць Валеры Леванеўскага і ягонай сям’і :: Хартыя'97 :: Навiны

21 ліпеня да справы пра публічную абразу прэзыдэнта Лукашэнкі, якую вядзе Ленінская раённая пракуратура Горадні, дадалася новая крымінальная справа, распачатая адразу адносна чатырох асоб – кіраўніка Агульнанацыянальнага страйкаму прадпрымальнікаў і сябра Еўрапейскай кааліцыі “Свабодная Беларусь” Валер’я Леванеўскага й яго намесніка Аляксандра Васільева, якіх спачатку зьвінавачвалі толькі за публічную абразу прэзыдэнта, жонкі Васільева Наталі й 18-гадовага сына Леванеўскага – Уладзімера. Усіх чатырох зьвінавачваюць за арганізацыю несанкцыянаванага мітынгу 1 траўня й грубыя парушэньні грамадзкага парадку.

Крымінальная справа распачата паводле артыкулу 342 Крымінальнага кодэксу. Прадугледжана пакараньне – да трох гадоў зьняволеньня. У пастанове старшага сьледчага пракуратуры Альфрэда Танкевіча гаворыцца, што Леванеўскі й Васільеў вырабілі й распаўсюдзілі мноства ўлётак з заклікам прыйсьці 1 траўня на мітынг. Далей азначана, што на пляцы Леніна адбыўся несанкцыянаваны мітынг, у якім актыўна ўдзельнічалі жонка Васільева Наталя й сын Леванеўскага Ўладзімер.

Сьледчы Танкевіч падсумаваў: на мітынгу “быў груба парушаны грамадзкі парадак, спаралізаваны рух грамадзкага ды іншага транспарту на вул. Сацыялістычнай, а таксама ўдзельнікі несанкцыянаванага мітынгу аказвалі яўнае непадпарадкаваньне законным патрабаваньням прадстаўнікоў улады”.

Аляксандр Васільеў лічыць: новая крымінальная справа распачата таму, што вылучанае да іх зь Леванеўскім зьвінавачаньне за абразу прэзыдэнта – беспадстаўнае. Дагэтуль зьвінавачаным не паведамлена, як дакладна, якімі словамі быў абражаны прэзыдэнт Лукашэнка.

Вельмі сымбалічна, што крымінальная справа за першатравеньскі мітынг заведзена 21 ліпеня – у дзень 10 гадавіны кіраваньня Аляксандра Лукашэнкі, пасьля ягоных запэўніваньняў на ўчарашняй прэсавай канфэрэнцыі, што са свабодай слова ў Беларусі ўсё ня так дрэнна.

Трэба нагадаць, што Горадня стала адзіным горадам Беларусі, дзе 1 траўня адбыўся массавы мітынг з палітычнымі патрабаваньнямі: тры тысяч чалавек удзельнікі настойліва запатрабавалі адстаўкі Аляксандра Лукашэнкі.

21 ліпеня таксама Ленінскі раённы суд Горадні разгледзеў скаргу Валер’я Леванеўскага й ягонага адваката адносна меры стрыманьня. Леванеўскаму падоўжылі знаходжаньне пад вартай у сьледчым ізалятары – да 15 жніўня. Суд пакінуў меру стрыманьня бяз зьменаў.
Минск, Белоруссия lllll