У Мазыры зьбілі й абрабавалі актывіста АГП :: Хартыя'97 :: Навiны

У мінулыя выходныя ў Мазыры невядомыя зламысьнікі зьбілі й абрабавалі старшыню гомельскай абласной арганізацыі АГП Леаніда Арлова. На палітыка напалі у бязьлюдным месцы па дарозе з дому да офісу і ўдарылі ззаду па галаве. Калі Арлоў ачуняў, на месцы здарэньня ўжо нікога не было. Не было таксама сумкі з дакумэнтамі. Сябра АГП звярнуўся ў міліцыю. Заведзена крымінальная справа.

Другое здарэньне адбылося ў Мозыры са старшынём першаснай гарадзкой арганізацыі АГП Анатолем Петуховым. Калі ён знаходзіўся на лецішчы, невядомыя ўлезьлі да яго ў кватэру. Зьнікла стрэльба, больш нічога не ўзялі. Злодзеяў, відаць, цікавілі паперы, бо былі адкрыты тэчкі, а ўсе паперы раскіданы па падлозе. Больш нічога не забралі, хаця на відным месцы знаходзіліся грошы й іншыя каштоўнасьці. Таксама заяўлена ў міліцыю, і заведзена крымінальная справа.

І Анатоль Петухоў, і Леанід Арлоў актыўна ўдзельнічаюць у распачатай выбарчай кампаніі. Спадар Петухоў вылучыўся ў сябры мясцовай выбарчай камісіі, Арлоў – зьбіраецца балятавацца на дэпутата Палаты прадстаўнікоў. Таму яны не выключаюць, што гэтыя злачынствы былі не крымінальнага, а палітычнага характару.

Зьбіцьцё палітычных актывістаў невядомымі – зусім ня рэдкасьць у сёньняшняй Беларусі. Прыгадаем толькі некаторыя падобныя выпадкі толькі гэтага году.

2 студзеня ў Белазерску былі зьбітыя кіраўнік мясцовай філіі “Народнай грамады” Яўген Акаронка і ягоная жонка – дэпутат Белазеркага гарсавету Натальля Акаронка.

17 студзеня ў Менску каля свайго дому невядомымі быў зьбіты акадэмік Радзім Гарэцкі.

8 сакавіка ў Горадні быў зьбіты прафсаюзны актывіст Іван Раман.

26 красавіка, пасьля “Чарнобыльскага шляху” невядомымі ў Віцебску былі зьбітыя сябры Аб’яднанай Грамадзянскай партыі Фёдар Бакуноў і Сяргей Катушонак.

1 ліпеня каля свайго дому невядомымі ў масках былі зьбітыя дэпутат палаты прадстаўнікоў Валер Фралоў і ягоны кіроўца.

7 ліпеня невядомыя зьбілі і спрабавалі скрасьці былога дэпутата Вярхоўнага Савету Сяргея Антончыка, нагадвае Радыё Свабода.
Минск, Белоруссия