У Гародні скончана сьледзтва па крымінальнай справе аб абразе прэзыдэнта :: Хартыя'97 :: Навiны

У Горадні скончана сьледзтва па крымінальнай справе аб публічнай абразе Аляксандра Лукашэнкі. Зьвінавачаных двух – гэта кіраўнікі страйкаму прадпрымальнікаў Валер Леванеўскі й Аляксандар Васільеў. 2 жніўня яны ўпершыню ўбачылі матэрыялы сваёй крымінальнай справы, якія склалі шэсьць тамоў. У зьвінавачаньні цяпер удакладнена: яны ўдвох распаўсюдзілі ўлётку, на адвароце якой надрукаваны верш на рускай мове “Рахунак за камунальныя паслугі або “жыроўка”, які, нібыта, абражае прэзыдэнта.

Валеры Леванеўскага падчас сьледзтва трымалі за кратамі, дзе ён сядзіць 94 дзень. З матэрыяламі крымінальнай справы ён знаёміцца ў турме з прысутнасьцю свайго адваката. Аляксандар Васільеў, тым часам, тое самае рабіў у Ленінскай раённай пракуратуры. Ягоныя ўражаньні ад першых трох тамоў такія:

“Сабралі ўсе нашыя бюлетэні за некалькі гадоў. І вось яны лічаць, што работа, якую мы праводзілі, – накіравана на дэстабілізацыю грамадзка-палітычнай абстаноўкі”.

Тут маюцца на ўвазе бюлетэнь “Предприниматель” ды іншыя, у якіх спадары Леванеўскі й Васільеў асьвятлялі праблемы прадпрымальнікаў і іхныя акцыі пратэсту. На цяперашні час Аляксандра Васільева таксама зьвінавачваюць за арганізацыю несанкцыянаванага мітынгу 1 траўня ў Горадні, пасьля якога, лічыць сьледзтва, адбылося несанкцыянаванае шэсьце з грубым парушэньнем грамадзкага парадку, нагадвае Радыё Свабода.
Минск, Белоруссия lllll